کراچی (مانیٹرنگ ڈیسک)فرح ناز اسفہانی اور نادیہ گبول کے وارنٹ گرفتاری جاری ۔نجی ٹی وی اے آر وائی نیوز کے مطابق کراچی کی سٹی کورٹ نےفرح ناز اسفہانی اور نادیہ گبول کے وارنٹ گرفتاری جاری کر دئیے۔ سٹی کورٹ میں دہری شہریت کیس کی سماعت ہوئی جس کے دوران فرح ناز اسفہانی کے وکیل نے موقف اپنایا کہ فرح ناز علاج کیلئے ملک سے باہر ہیں اس لیے انہیں حاضری سے استثنیٰ دیا جائے۔

الیکشن کمیشن نے اپنے موقف میں عدالت کو بتایا کہ دونوں خواتین کی جانب سے تاخیری حربے اپنائے جا رہے ہیں، عدالت انہیں گرفتار کرکے عدالت میں پیش کرنے کا حکم دے۔ جس پر عدالت نے دونوں کے وارنٹ گرفتاری جاری کر دیے۔واضح رہے کہ فرح ناز اسفہانی سابق سفیر حسین حقانی کی اہلیہ ہیں ، وہ 2008 میں سندھ سے پیپلز پارٹی کی خواتین کیلئے مخصوص نشست پر رکن قومی اسمبلی منتخب ہوئی تھیں۔دوسری جانب نادیہ گبول لیاری سے تعلق رکھتی ہیں ، وہ 2006 میں متحدہ قومی موومنٹ میں شامل ہوئی تھیں جس کے بعد انہوں نے 2008 کے انتخابات میں پی ایس 109 سے الیکشن لڑا اور رکن صوبائی اسمبلی منتخب ہوئیں۔ پیپلز پارٹی کی حکومت میں وہ صوبائی وزیر انسانی حقوق رہیں جس کے بعد اکتوبر 2013 میں انہوں نے پاکستان پیپلز پارٹی میں شمولیت اختیار کرلی تھی۔

موضوعات:دہری شہریت کیس