لاہور(آئی این پی )باخبر ذرائع سے معلوم ہوا ہے کہ وزیراعلیٰ پنجاب میاں شہباز شریف کے قومی اسمبلی کے حلقہ این اے 120سے الیکشن لڑنے کا حتمی فیصلہ تاحال نہیں ہوا ،پارٹی قیادت کی جانب سے شہباز شریف کو دیگر دو حلقوں سے الیکشن لڑانے کی نئی تجویز سامنے آئی ہے۔
ذرائع کے مطابق وزیراعلیٰ پنجاب میاں شہباز شریف کے حلقہ این اے 120سے تاحال حتمی فیصلہ نہیں ہوا ہے ۔پارٹی میں نئی تجویز سامنے آئی ہے جس کے مطابق لاہور ،اوکاڑہ اور شیخوپورہ میں سے دو نشستوں کو خالی کرا کر شہباز شریف کو دو الیکشن لڑایا جائے گا ۔ذرائع کے مطابق نااہلی کے بعد سابق وزیراعظم میاں نوازشریف کو مسلم لیگ (ن) کی صدارت کے حوالے سے قانونی مشکلات کا سامنا ہے ، سینٹرل ورکنک کمیٹی کے آئندہ ہونے والے اجلاس میں شہباز کو پارٹی کا صدر بنانے کی تجویز پیش کی جائے گی ۔ ذرائع کے مطابق این اے 128سے نوازشریف کی صاحبزادی مریم نواز کو الیکشن لڑانے کے حوالے سے تجویز زیر غور ہے تاہم اس بارے میں کوئی بھی حتمی فیصلہ قانونی ماہرین کی مشاورت کے بعد سے کیا جائے گا کیونکہ پانامہ کیس کے حوالے سے مریم نواز کے خلاف ریفرنس دائر کئے جانے کے بعد ان کے الیکشن لڑنے کے حوالے سے قانونی ماہرین سے رائے لی جائے گی کہ آیا وہ الیکشن لڑ سکتی ہیں یا نہیں ۔
