راولپنڈی / راجگال(این این آئی)آرمی چیف جنرل قمر جاوید باجوہ نے کہا ہے کہ قوم کی مکمل حمایت سے ہم ایسے پاکستان کی طرف بڑھ رہے ہیں جہاں ریاست کی عمل داری اور قانون کی بالادستی ہر چیز سے مقدم ہو گی اور شہروں ، قبائلی یا دور دراز علاقوں میں رہنے والا ہر پاکستانی ملک کی ترقی میں اپنا مثبت اور حقیقی کردار ادا کر سکے گا ،اللہ کی رحمتوں پر شکر ادا کرتے ہیں جس نے پاک فوج کو ملک سے دہشتگردی اور عسکریت پسندی کیخلاف کامیابیاں دے کر قوم کی توقعات پر پورے اترنے کے قابل بنایا ۔
آئی ایس پی آر کے مطابق چیف آف آرمی سٹاف جنرل قمر جاوید باجوہ نے ہفتہ کو خیبر ایجنسی کی وادی راجگال کا دورہ کیا ۔ آرمی چیف کو آپریشن خیبر فور کے حوالے سے تفصیلی بریفنگ دی گئی جس کے دوران سیکیورٹی فورسز نے 90 فیصد سے زائد علاقہ کلیئر کرا لیا ہے ۔ پاک فوج کے سربراہ نے آپریشن میں شریک فوجیوں کی پیشہ ورانہ صلاحیت کو سراہا اور دہشتگردوں کے مضبوط ٹھکانوں کو انتہائی مہارت سے نشانہ بنانے پر پاکستان ایئر فورس کی حمایت کو بھی سراہا ہے جس کی وجہ سے فورسز کا اپنا جانی نقصان کم سے کم ہوا ہے۔ اس آپریشن کی تکمیل سے خیبر ایجنسی دہشتگردوں کے اثر پاک ہو جائے گی اور عارضی بے گھر افراد کی واپسی اور ترقیاتی کام ممکن ہو سکیں گے ۔ اس موقع پر افسروں اور جوانوں سے گفتگو کرتے ہوئے آرمی چیف نے اللہ کی رحمتوں پر شکر ادا کیا جس نے پاک فوج کو ملک سے دہشتگردی اور عسکریت پسندی کیخلاف کامیابیاں دے کر قوم کی توقعات پر پورے اترنے کے قابل بنایا ۔ جنرل قمر جاوید باجوہ نے کہا کہ قوم کی مکمل حمایت سے ہم ایسے پاکستان کی طرف بڑھ رہے ہیں جہاں ریاست کی عمل داری اور قانون کی بالادستی ہر چیز سے مقدم ہو گی اور شہروں ، قبائلی یا دور دراز علاقوں میں رہنے والا ہر پاکستانی پاکستان کی ترقی میں اپنا مثبت اور حقیقی کردار ادا کر سکے گا ۔
قبل ازیں کمانڈر پشاور کور لیفٹیننٹ جنرل نذیر احمد بٹ اورکمانڈر خیبر فور آپریشن آئی جی ایف سی خیبر پختونخوا نارتھ میجر جنرل شاہین مظہر محمود نے آرمی چیف کی آپریشن ایریا میں آمد پر انکا استقبال کیا ۔
