اسلام آباد (آئی این پی) پاکستان مسلم لیگ (ن) کے رہنما سنیٹر ڈاکٹر آصف کرمانی نے کہا ہے کہ عمران خان کو مبارک ہو، انہوں نے چپڑاسی کو وزیراعظم کیلئے نامزد کیا ہے، پارٹی تحفظات کے باوجود عدالتی فیصلے پر عملدرآمد کیا ہے، عمران خان راہزن تو ہو سکتا ہے راہبر نہیں ہو سکتا، نواز شریف عوام کی عدالت سے سرخرو ہوں گے، عمران خان نے ملکی سیاست میں بدتہذیبی اور گالم گلوچ کاکلچرمتعارف کرایا ہے، عمران خان کی طرف سے سپریم کورٹ میں جمع کرائے گئے کاغذات جعلی ہیں۔
پیر کو سپریم کورٹ کے باہر میڈیا سے گفتگو کرتے ہوئے ڈاکٹر آصف کرمانی نے کہا کہ ہم نے عدالت عظمیٰ کے فیصلے پر من و عن عملدرآمد کیا ہے، عدالت کے فیصلے کے بعد نواز شریف مری پہنچے تو عوام کے جم غفیر نے ان کا استقبال کیا، فیصلہ آنے سے قبل پیش گوئی کرنے والے ناکام ہوئے، پارٹی تحفظات کے باوجود عدالت کے فیصلے سر سرتسلیم خم کیا۔ انہوں نے کہا کہ عدالتوں کے فیصلوں کا احترام کرتے ہیں لیکن ایک عدالت عوام کی بھی ہے، نواز شریف عوام کی عدالت سے سروخرو ہوں گے، عمران خان کی طرف سے جمع کرائے گئے کاغذات جعلی اور فراڈ ہیں، پٹیشن میں کی گئی استدعا کے مطابق فیصلہ نہیں آیا، عمران خان نے ملکی سیاست میں بدتہذیبی اور گالم گلوچ کا کلچر متعارف کرایا ہے۔ آصف کرمانی نے کہا کہ قوم عمران خان سے بدتہذیبی کا حساب لے گی، نواز شریف پر کرپشن کا کوئی الزام ثابت نہیں ہو سکا، عمران خان کے جلسے میوزیکل نائیٹ ہوتے ہیں، عمران خان جیسا شخص راہزن تو ہو سکتا ہے لیکن رہبر نہیں بن سکتا، قوم عمران خان سے پوچھتی ہے کہ آف شور کمپنی کیوں چھپائی۔ انہوں نے کہا کہ عمران خان کی جانب سے فراہم کردہ فہرستوں میں تضاد ہے، عمران خان نے کہا تھا کہ وہ شیخ رشید کو چپڑاسی رکھنا بھی پسند نہیں کرتے، عمران خان کو مبارک ہو انہوں نے چپڑاسی کو وزیراعظم کیلئے امیدوار نامزد کیا ہے، عمران خان کو چھپنے اور بھاگنے نہیں دیں گے، کیس کا فیصلہ آتے ہی عمران خان کی سیاست ختم ہو جائے گی۔
