لاہور( این این آئی)پاکستان عوامی تحریک کے سربراہ ڈاکٹر طاہر القادری نے کہا ہے کہ پاناما جے آئی ٹی حکمران جماعت کا الیکشن سیل ہے اور وہ مسلم لیگ (ن)کی الیکشن مہم اور نعرہ تیار کررہی ہے، اس سے خیر کی توقع رکھنے والوںپر حیران ہوں،حسین نواز کو کرسی میز رکھ کر دی گئی اور ان کے اپنے میڈیا سیل نے تصویر بنا کرجاری کی اور پھر خود ہی تبصرے بھی کر رہے ہیں،ملک میں عدل و انصاف کا قتل ہورہا ہے،

سانحہ ماڈل ٹائون پر ہر قسم کی پیشرفت روک دی گئی ہے،قصاص تحریک کا ایک رائونڈ ہوا ہے ابھی دو کا حق محفوظ رکھتے ہیں،اس ملک میں الیکشن نہیں ڈرامہ ہوتا ہے ،تبدیلی جھولی میں نہیں آتی قوم کو جدوجہد کرنا ہو گی، ملک کی تمام سیاسی قیادتوں کے ساتھ رابطے میں ہیں، تخت لاہور کے خلاف سب کوایک پلیٹ فارم پر لائیں گے،سب کو یک نکاتی ایجنڈے پر اکٹھا کرنے کے لئے جو ممکن ہوا کریں گے۔ ان خیالات کا اظہار انہوں نے بیرون ملک سے وطن واپسی پر لاہور ائیر پورٹ پر میڈیا سے گفتگو اور کارکنوں سے خطاب کرتے ہوئے کیا۔ ائیر پورٹ پر عوامی تحریک کے رہنمائوں اور کارکنوںنے ان کااستقبال کیا اور پھولوں کی پتیاں نچھاور کیں۔ ڈاکٹر طاہر القادری نے کہا کہ معلوم ہے ملک میں آئین ،قانون اور عدالتوں کا حال کیا ہے لیکن مرتے دم تک سانحہ ماڈل ٹائون کے لیے قانونی جنگ لڑتے رہیں گے، سانحہ ماڈل ٹائون کے اصل دماغ حکمران ہیں لیکن کسی بھی فورم پر اصل قاتلوں کو اب تک طلب ہی نہیں کیا گیا،حکمرانوں اور 124پولیس افسران کی طلبی ہی نہیں ہوئی ،ہم نے شہداء کے خون سے وفاداری کی قسم کھائی ہے ۔ ، قصاص تحریک کا ایک رائونڈ کیا ابھی دو کا حق محفوظ رکھتے ہیں۔ انہوںنے سانحہ ماڈل ٹائون پر ہر قسم کی پیشرفت روک دی گئی ہے ،بنچ ٹوٹے اب بنچ ہے تو تاریخ ہی نہیںمل رہی ، جسٹس باقر نجفی رپورٹ پر درخواست گزشتہ سال سے التواء میں ہے ،عدالت کوئی فیصلہ تو کرے تب سپریم کورٹ میں جائیں گے،
لیکن فیصلہ جو بھی ہو ہم شہیدوں کے خون کیلئے انصاف مانگتے رہیں گے اور خاموش نہیں بیٹھیںگے، مرتے دم تک قانون کی جنگ لڑتے رہیں گے۔ انہوںنے پانامہ لیکس کی تحقیقات کے لئے جے آئی ٹی کی تشکیل کے حوالے سے سوال کے جواب میں کہا کہ پانامہ جے آئی ٹی مسلم لیگ (ن)کا الیکشن سیل ہے جو منشور اور الیکشن مہم تیار کررہی ہے، یہاں پر ہی الیکشن کا نعرہ تیار ہو رہا ہے، اس کے ذریعے ملک کے 20 کروڑعوام کو پاگل بنایا جا رہا ہے، اس سے خیر کی توقع رکھنے والوں پر حیران ہوں۔ انہوںنے حسین نواز کی تصویر لیک ہونے کو ڈرامہ قرار دیتے ہوئے کہا کہ حسین نواز کی تصویر اس لیے بنائی گئی تاکہ تاثر دیا جائے کہ ظلم ہورہا ہے،خود تصویر جاری کرکے خود ہی تبصرے کیے جارہے ہیں۔انہوں نے مزید کہا کہ اس ملک کے اندر تلوں میں تیل نہیں، تبدیلی جھولی میں نہیں آتی، قوم کو جدوجہد کرنا ہوں گی، ملک کی تمام سیاسی قیادتوں کے ساتھ رابطے میں ہیں، تخت لاہور کے خلاف سب کوایک پلیٹ فارم پر لائیں گے،سب کو یک نکاتی ایجنڈے پر اکٹھا کرنے کے لئے جو ممکن ہوا کریں گے۔ انقلاب آئے گا تبدیلی آئے گی اور ملک کا مقدر بدلے گا ، اس ملک کے الیکشن کو الیکشن نہیں سمجھتے یہ سب فراڈ ہے ۔بعد ازاں ڈاکٹر طاہر القادری کو انتہائی سخت سکیورٹی میں میں انکی رہائشگاہ ماڈل ٹائون لایا گیا جہاں کارکنوں کارکنوں کی کثیر تعداد صبح سے ان کے استقبال کے لئے جمع تھی ۔ اس موقع پر کارکنوں نے اپنی قیادت کے حق میں نعرے لگاتے ہوئے بھنگڑے بھی ڈالتے رہے۔

موضوعات:طاہر القادری