کراچی(مانیٹرنگ ڈیسک)آرمی چیف جنرل قمر جاوید باجوہ نے کہا ہے کہ کراچی آپریشن جاری رہے گا اور اس حوالے سے حکمت علمی یا پالیسی میں کوئی تبدیلی نہیں ہوگی۔پاک فوج کے شعبہ تعلقات عامہ (آئی ایس پی آر) کی جانب سے جاری بیان کے مطابق آرمی چیف جنرل قمر جاوید باجوہ نے کراچی کے دورے کے دوران تاجر برادری اورصنعت کاروں سے ملاقات کی۔ملاقات کے دوران آرمی چیف نے
تاجر برادری کو یقین دہانی کرائی کہ شہر سے جرائم کے خاتمے تک کراچی آپریشن جاری رہے گا۔آئی ایس پی آر کے مطابق بزنس کمیونٹی سے خطاب کرتے ہوئے آرمی چیف جنرل قمر جاوید باجوہ کا کہنا تھا کہ ’شہر سے جرائم کے خاتمے تک کراچی آپریشن جاری رہے گا‘۔آرمی چیف نے اپنے خطاب میں کہا کہ کراچی میں امن کی بحالی کے لیے تمام ممکنہ اقدامات اٹھائے جائیں گے، جب کہ کراچی آپریشن کے حوالے سے حکمت عملی برقرار رہے گی، اس میں کوئی بھی تبدیلی نہیں کی جائے گی۔آرمی چیف جنرل قمر جاوید باجوہ نے کاروباری حضرات کو اس بات کی بھی یقین دہانی کرائی کہ امن و امان کی بہتری سے کراچی میں کاروبار اور سرمایہ کاری کو فائدہ پہنچے گا۔آئی ایس پی آر کے مطابق کراچی دورے کے دوران آرمی چیف جنرل قمر جاوید باجوہ نے فوجی جوانوں،رینجرز اور قانون نافذ کرنے والے اداروں کے اہلکاروں اور افسران سے جاری آپریشن کے حوالے سے خطاب کیا۔آرمی چیف نے دہشت گردی، ٹارگیٹ کلنگ اور اغوا برائے تاوان میں نمایاں کمی کے لیے کی جانے والی کوششوں کی بھی تعریف کی۔اس موقع پر آرمی چیف نے اس بات کا بھی اعادہ کیا کہ شہر میں مستحکم امن برقرار رکھنے کی کوششیں بلاروک ٹوک جاری رہیں گی۔آئی ایس پی آر کی جانب سے جاری کردہ بیان کے مطابق آرمی چیف نے مزید کہا کہ فوج ان تمام سرکاری اداروں خصوصی طور پر سندھ پولیس اور سول ایڈمنسٹریشن کی حمایت برقرار رکھے گی جو کراچی آپریشن میں حصہ دار ہیں۔
