راولپنڈی/لندن /نئی دہلی ( آئی این پی ) پاک فوج نے بھارت کی جانب سے ورکنگ باؤنڈری اور ایل او سی پر بلا اشتعال فائرنگ کے دوران پاکستانی فوجیوں کو نشانہ بنانے کے دعوے کو مسترد کرتے ہوئے کہا ہے کہ بھارتی فوج نے ورکنگ باؤنڈری کے شکر گڑھ سیکٹر میں بلا اشتعال فائرنگ کی جس سے کوئی جانی نقصان نہیں ہوا ، پاک فوج نے بھارتی فوج کی اشتعال انگیزی کا منہ توڑ جواب دیا ، بھارت کا کسی پاکستانی فوجی کو نشانہ بنانے کا دعویٰ صریحاً غلط ہے۔ جمعہ کو پاک فوج کے شعبہ تعلقات عامہ ( آئی ایس پی آر ) کے مطابق بھارتی فوج کی جانب سے ورکنگ باؤنڈری کے شکر گڑھ سیکٹر میں بلا اشتعال فائرنگ کی ۔ پاک فوج نے بھارتی فوج کو منہ توڑ جواب دیا ۔ بھارتی فائرنگ سے کوئی پاکستانی فوجی شہید نہیں ہوا ۔ بھارت کا کسی پاکستانی فوجی کو نشانہ بنانے کا دعویٰ صریحاً غلط ہے ۔ ورکنگ باؤنڈری اور ایل او سی پر بلا اشتعال فائرنگ سے کوئی جانی نقصان نہیں ہوا۔اس سے قبل بھارت کی سرحدی فورس بی ایس ایف نے دعویٰ کیا تھا کہ اس نے جموں خطے میں ایک کارروائی میں پاکستانی سرحدی فورس رینجرز کے سات اہلکاروں کو شہید کر دیا ہے ۔ بی ایس ایف کی جانب سے جاری ہونے والے بیان کے مطابق فورسز کی کارروائی میں ایک شدت پسند بھی مارا گیا ہے۔بیان میں کہا گیا ہے کہ یہ کارروائی جموں کے ہیرا نگر سیکٹر میں جمعہ کی صبح پاکستانی رینجرز کی طرف سے ایک سنائپر حملے کے بعد کی گئی۔بیان میں مزید کہا گیا ہے کہ 19 اور 20 اکتوبر کی درمیانی شب ہیرا نگر سکٹر کے بوبیاں گاؤں کے علاقے میں دراندازی کی کوشش کی گئی تھی۔ جوابی کارروائی میں ایک شدت پسند مارا گیا۔بی ایس ایف کا کہنا ہے کہ جمعے کی صبح بین الاقوامی سرحد پر اسی علاقے میں پاکستانی رینجرز نے بی ایس ایف کی گشتی ٹکڑی کو نشانہ بنایا۔ رینجرز کی فائرنگ میں ایک کانسٹیبل زخمی ہوا ہے جس کی حالت نازک بتائی گئی ہے۔ واقعے کے بعد سکیورٹی انتظامات کو مزید سخت کر دیا گیا ہے۔دوسری جانب پنجاب رینجرز کے ترجمان میجر وحید نے برطانوی نشریاتی ادارے سے بات کرتے ہوئے بی ایس ایف کے اس دعوے کو مسترد کیا اور کہا کہ ایسا کوئی واقعہ پیش نہیں کیا ہے۔انھوں نے انڈین دعوے کے حوالے سے ایک سوال کے جواب میں کہا کہ اس طرح کے دعوے کرنا ان کی عادت بن گئی ہے۔

موضوعات:آئی ایس پی آر بھارتی فوج