مردان (این این آئی)وفاقی وزیر اطلاعات و نشریات سینیٹر پرویز رشید نے کہا ہے کہ عمران خان 30اکتوبر اسلام آباد میں نہیں کہیں اور نظرآئیں گے ٗ سازش سے حکومت کا تختہ الٹنے والے عوام کے ہمدرد نہیں ہوسکتے ٗوزیراعظم نے قوم کی خدمت کیلئے کوئی کسر نہیں چھوڑی ٗ عوام 2018 کے انتخابات میں شیر پر مہر لگا کر مخالفین سے بدلہ لیں گے ٗکے پی کے میں درجنوں کے نام پر اربوں روپے ہڑپ کرلئے گئے ۔اتوار کو مسلم لیگ (ن) کے جلسے سے خطاب کرتے ہوئے پرویز رشید نے کہا کہ امن کی ضرورت سب سے زیادہ پاکستان کو ہے ٗ وزیر اعظم نواز شریف کا ایجنڈا بھی امن اور روشنی دینا ہے۔پاکستان تحریک انصاف (پی ٹی آئی) کے چیئرمین عمران خان کی جانب سے 30 اکتوبر کو اسلام آباد کی جانب مارچ کو تنقید کا نشانہ بناتے ہوئے وفاقی وزیر اطلاعات نے کہاکہ قوم نے عمران خان کا رائے ونڈ مارچ کو ناکام بنایا ٗوعدہ کرتا ہوں کہ وہ 30 اکتوبر کو بھی نظر نہیں آئیں گے وہ ہوں گے کہاں؟ یہ بعد میں بتاؤں گا۔عمران خان کی جانب سے وزیر اعظم سے استعفے لینے کے مطالبہ پر انہوں نے کہا کہ مسلم لیگ یلغار کی سیاست نہیں کرتی ٗدہشتگردی کا خاتمہ اور ترقی کا سفر نواز شریف نے شروع کیا ٗیہ نہیں ہوسکتا کہ عوام تکلیف میں ہوں اور وزیراعظم چین سے سوئیں۔پرویز رشید نے کہا کہ 2018 کے انتخابات میں شیر پر مہر لگا کر مخالفین سے بدلہ لیں گے، وزیراعظم نے قوم کی خدمت کیلیے کوئی کسر نہیں چھوڑی۔خیبر پختونخوا میں حکومت سازی کے حوالے سے انہوں نے جلسے کے شراء کو بتایا کہ ہم نے عمران خان کی جماعت کو خیبر پختونخوا میں حکومت بنانے کا موقع دیا ٗمسلم لیگ (ن) آج بھی خیبرپختونخوا میں اپنی اکثریت ثابت کرسکتی ہے تاہم ہم نے پی ٹی آئی کو موقع دیا کہ خیبر پختونخوا سے کیے گئے وعدوں کو پورا کرے۔صوبے میں تحریک انصاف کی جانب سے ایک ارب درخت لگانے کی مہم پر انہوں نے کہا کہ تحریک انصاف درخت لگائے ٗمسلم لیگ ن کے کارکن ان درختوں کو پانی دیں گے، مردان سے اٹک تک کوئی ایک درخت دکھا دیا جائے ٗ درختوں کے نام پر اربوں روپے ہڑپ کرلیے گئے۔ انہوں نے کہا کہ اگر چاہتے تو پی ٹی آئی کو خیبر پختونخوا میں حکومت نہ بنانے دیتے ٗآج بھی پی ٹی آئی کی حکومت ہماری محتاج ہے ٗچاہیں تو ایک اشارے پر پی ٹی آئی کو کے پی اسمبلی سے باہر نکال دیں اور اپنی اکثریت ثابت کر دیں۔پرویز رشید نے کہا کہ مسلم لیگ ن نے کبھی یلغار کی سیاست نہیں کی، جلسے کو دیکھ کر میں نہیں کہہ سکتا کہ کسی کے گھر پر حملہ کر دیں۔ انہوں نے کہا کہ نواز شریف نے اپنا سکھ اور چین عوام کیلئے قربان کر دیا ٗہمارا اور آپ کا دکھ سکھ کا رشتہ ہے۔اس موقع پر وفاقی وزیر منصوبہ بندی چودھری احسن اقبال نے کہا کہ 2012ء تک پاکستان میں دہشتگردی عروج پر تھی تاہم آج ملک میں امن ہے اور دہشتگرد بھاگ رہے ہیں ٗاحسن اقبال نے کہا کہ سی پیک پورے ملک کا منصوبہ ہے۔ اس سے پورا ملک فائدہ اٹھائے گا۔ انہوں نے کہا کہ وفاقی حکومت نے پچھلے ایک سال میں کے پی کیلئے 100 سے زائد منصوبے بنائے ہیں۔ انہوں نے کہا کہ جب بھی پاکستان ترقی کرنے لگتا ہے کچھ لوگ اندر سے ہی اٹھ کھڑے ہوتے ہیں۔ انہوں نے کہا کہ ن لیگ کو عمران کان کی سیاست کی وجہ سے آئندہ انتخابات میں دو تہائی ووٹ ملیں گے۔ انہوں نے کہا کہ عمران اسی طرح سڑکوں پر لیفٹ رائٹ کرتا رہے گا اور ہم پاکستان کی ترقی کیلئے کام کرتے رہیں گے۔ انہوں نے کہا کہ سی پیک کی وجہ سے آج پاکستان کو سرمایہ کاروں کی جنت کہا جاتا ہے۔ سی پیک سے پنجاب اور سندھ کی نسبت بلوچستان اور خیبر پختونخوا زیادہ فائدہ اٹھائیں گے۔ اس موقع پر چودھری احسن اقبال نے جمشید خان کو (ن )لیگ میں شمولیت پر خوش آمدید کہا۔اس موقع پر امیر مقام نے بھی خطاب کیا اور پی ٹی آٰئی کی صوبائی حکومت کو کڑی تنقید کا نشانہ بنایا۔

موضوعات:عمران خان