اسلام آباد (آئی این پی )بھارتی میڈیا نے دعویٰ کیا ہے کہ مودی سرکارناقدین کو خاموش کرانے کیلئے جلد سرجیکل سڑائیکس کی ویڈیو جاری کرے گی۔بھارتی میڈیا کے مطابق مودی حکومت کنٹرول لائن کے دوسری طرف پاکستان کے علاقے میں سرجیکل سٹرائیک کے دعوے کو ثابت کرنے کیلئے ویڈیو جاری کر سکتی ہے۔بھارتی فوج نے فوٹیج جاری کرنے کیلئے منظوری دید ی ہے تاہم اسکی حتمی منظوری کیلئے وزیراعظم آفس کی طرف سے انتظار ہے۔کنٹرول لائن کے دوسری طرف پاکستان کے علاقے میں سرجیل سٹرائیک کے دعوے کے بعد اپوزیشن لیڈر وں اور جماعتوں نے مودی حکومت سے سٹرجیکل سڑائیک کے بارے میں ثبوت فراہم کرنے کا مطالبہ کیا تھاجبکہ اڑی حملے اور سرجیکل سڑائیک کے ڈرامے کے بعد اب بھی بھارتی میڈیا جھوٹ بولنے سے باز نہ آیا،بھارتی میڈیا نے الزام عائد کیا ہے کہ مبینہ سرجیکل سڑائیک کے بعد پاکستانی ہیکرز نے بدلہ لینے کیلئے متعددبھارتی ویب سائٹوں پر حملہ کردیا۔بھارتی میڈیا کا دعویٰ ہے کہ سرجیکل سڑائیک کے بعدمختلف بھارتی ویب سائٹس کو پاکستانی ہیکروں کی جانب سے سائبر حملوں کا سامنا کرنا پڑا ہے اورپاکستانی ہیکرزکا دعویٰ ہے کہ ان کا یہ اقدام سرجیکل سڑائیک کا انتقام ہے۔بھارتی میڈیا کے مطابق ہیک کی جانے والی مختلف ویب سائٹوں پر ہیکرز نے یہ پیغامات چھوڑے ہیں کہ ہم ناقابل شکست ہیں ،تم نے اپنے ملک کے دفاع کے نام پر کشمیر میں معصوم لوگوں کو قتل کیا ،تم نے سرحد پر سیز فائر کی خلاف ورزی کی اور اسے سرجیکل سڑائیک قرار دیا اب تم سائبر جنگ کی آگ کا مزہ چکھو۔
دوسری جانب بھارتی میڈیا نے دعویٰ کیا ہے کہ اڑی حملے کے بعد قومی سلامتی کے مشیر اجیت دوول اور انکے پاکستانی ہم منصب ناصر خان جنجوعہ کے درمیان پہلے رابطے کے دوران بھارت نے گزشتہ ہفتے کنٹرول لائن کے دوسری طرف کی گئی مبینہ سرجیکل سٹرائیک کی تفصیلات سے آگاہ کردیا تھا۔بھارتی میڈیا کے مطابق قومی سلامتی کے مشیر اجیت دوول اور انکے پاکستانی ہم منصب ناصر خان جنجوعہ سے کہا کہ بھارت اپنے مفادات کی حفاظت کرنے کا حق رکھتا ہے۔دو روز قبل پاک بھارت قومی سلامتی کے مشیروں کے درمیان ٹیلی فونک رابطہ ہوا تھا جس میں دونون جانب سے کشیدگی میں کمی پر اتفاق کیا گیا تھا اس کی تصدیق مشیر خارجہ سرتاج عزیز نے کی تھی۔واضح رہے کہ بھارت نے کنٹرول لائن کے دوسری طرف پاکستان کے علاقے میں سرجیکل سٹرائیک کاجھوٹا دعویٰ کیا تھا جسے پاک فوج نے سختی سے مسترد کردیا تھا۔