راولپنڈی(مانیٹرنگ ڈیسک) لائن آف کنٹرول پر بھارتی جارحیت کے بعد ڈی جی ایم اوز کی ہاٹ لائن پر ہونے والی گفتگو کے دوران ایک اور بھارتی جھوٹ پکڑاگیا ۔ڈی جی آئی ایس پی آرلیفٹیننٹ جنرل عاصم باجوہ نے بتا یا کہ گزشتہ رات لائن آف کنٹرول پر بھارتی فورسز کی جارحیت کے بعد پاک بھارت ڈی جی ایم اوز کا ہاٹ لائن پر رابطہ ہوا جس میں بھارتی ڈی جی ایم او نے الزام لگا یا کہ لائن آف کنٹرول پر نقل و حرکت دیکھی گئی تھی جس پر بھارتی فورسز نے کارروائی کی ۔لیفٹیننٹ جنرل عاصم باجوہ نے بتا یا کہ جب گراؤنڈ پر صورتحال دیکھی گئی تو وہاں نقل و حرکت کا کوئی ثبوت نہیں ملا ۔ انہوں نے کہا کہ بھارت نے ایل او سی دراندازی روکنے کے لیے زبردست نظام لگا رکھا ہے اور وہاں بھارتی سیکیورٹی کے تین حصار بنا رکھے ہیں۔ان کا کہنا تھا کہ بھارتی سیکیورٹی حصار ایل او سی سے 3,4کلو میٹر تک پھیلا ہوا ہے جس کی باڑ میں بجلی دوڑ رہی ہے ،اس باڑ پر پرندہ بھی جل جاتا ہے ۔لیفٹیننٹ جنرل عاصم سلیم باجوہ نے کہا کہ بھارت کی جانب سے ایل او سی پر مورچے اور گراونڈ سینسرز لگے ہوئے ہیں ،کیا سخت سیکیورٹی کے باوجود در اندازی کا الزام بھارتی سسٹم کی ناکامی ہے ؟۔انہوں نے مزید کہا کہ پاکستان کی ریاستی پالیسی ہر قسم کی در اندازی کی حوصلہ افزائی نہ کرنا ہے ۔ایک سوال پر انہوں نے کہاکہ روس کے ساتھ کافی عرصے سے فوجی سفارتکاری چل رہی تھی جس کی وجہ سے مشترکہ جنگی مشقعوں کا آغاز ہوا جو کہ پاکستان کی بڑ ی کامیابی ہے ۔ان کا کہنا تھا کہ دہشت گردی کے خلاف جنگ میں جس طرح سے پاکستان نے کارروائی کی اس کو ساری دنیا مانتی ہے اور دنیا ہمارے تجربے سے فائدہ اٹھاناچاہتی ہے۔انہوں نے کہاکہ پاک فوج کادنیامیں کوئی ثانی نہیں ہے لیکن بھارتی فوج بزدلی کی نشانی ہے ۔