اسلام آباد (آئی این پی )مووآن پارٹی پاکستان کے چیئرمین میاں کامران کو اسلام آباد سے گرفتار کرلیاگیا۔ پارٹی ذرائع کے مطابق چیئرمین مووآن پاکستان کو اسلام آباد کے علاقے آبپارہ سے گرفتار کیاگیا۔ وہ ایک گیسٹ ہاؤس میں روپوش تھے۔ قانون نافد کرنے والے اداروں نے آرمی چیف جنرل راحیل شریف کے حق میں مختلف شہروں میں بینرز لگانے کے الزام میں غیر معروف سیاسی جماعت ’موو آن پاکستان‘ کے سربراہ میاں کامران کو گرفتار کرلیا ۔ ملزم کے خلاف موجودہ حکومت کے خلاف بغاوت پراکسانے کا مقدمہ درج ہے ۔
اس جماعت کی جا نب سے مختلف شہروں میں لگائے گئے ان بینرز پر آرمی چیف جنرل راحیل شریف کی تصویر کے ساتھ لکھا ہوا تھا کہ ’جانے کی باتیں ہوئیں پرانی خدا کے لیے اب تو آجاو۔موو آن پاکستان کے سربراہ میاں کامران کو اسلام آباد کے علاقے آبپارہ سے گرفتار کیا گیا ہے جہاں پر وہ ایک گیسٹ ہاوس میں قیام پذیر تھے۔ ملزم کامران اور ان کے دیگر ساتھیوں کے خلاف اسلام آباد کے علاوہ لاہور اور فیصل آباد میں بھی مقدمات درج تھے ۔ اسلام آباد میں یہ مقدمہ ریاست کی مدعیت میں درج کیا گیا جبکہ دیگر شہروں میں ملزمان کے خلاف مقدمات ریاست اور عام شہریوں کی طرف سے درج کروائے گئے ۔ تھانہ سیکرٹریٹ کے انچارج حاکم خان کے مطابق ملزم کامران کو لاہور سے آئی ہوئی پولیس کی ٹیم نے گرفتار کیا جبکہ اسلام آباد میں درج ہونے والے مقدمے میں ملزم نے 22 جولائی تک اسلام آباد ہائی کورٹ میں حفاظتی ضمانت لے رکھی تھی۔ اس مقدمے میں میاں کامران کے علاوہ دیگر نو افراد کو نامزد کیا گیا اور ملزمان کا تعلق پنجاب کے وسطی شہر فیصل آباد سے ہے۔