اسلام آباد (مانیٹرنگ ڈیسک) چیف جسٹس سندھ ہائیکورٹ کے مغوی بیٹے اویس شاہ کو بحفاظت بازیاب کرا لیا گیا ہے۔ منگل کو ایک نجی ٹی وی چینل کے مطابق ڈی جی آئی ایس پی آر عاصم سلیم باجوہ نے اپنے ٹوئٹ میں کہا کہ چیف جسٹس سندھ ہائیکورٹ کے بیٹے اویس شاہ ایڈووکیٹ کوصوبہ خیبر پختونخوا کے علاقے ٹانک میں ایک آپریشن کے دوران بازیاب کرایا گیا۔اویس شاہ کی صحت اچھی ہے اور وہ بہت خوش ہیں، خفیہ اطلاعات کی بنیاد پر کی گئی کارروائی کے دوران 3 دہشت گرد بھی ہلاک ہوئے ہیں۔
رپورٹ کے مطابق چیف جسٹس سندھ ہائیکورٹ کی رہائش گاہ کے باہرسیکیورٹی سخت کردی گئی ہے۔ دوسری جانب آرمی چیف جنرل راحیل شریف نے انٹیلی جنس اداروں اور سیکیورٹی فورسز کو کامیاب کارروائی پر مبارکباد دی ہے۔ گورنرسندھ عشرت العباد نے اویس شاہ کی بازیابی پر اطمینان کا اظہار کرتے ہوئے جسٹس سجاد علی شاہ کوفون پرمبارکباد دی ہے۔گورنرسندھ نے پاک فوج کوکامیاب کارروائی پرمبارکباد پیش کی۔چیف جسٹس سند ھ ہائیکورٹ کے صاحبزادے بیرسٹر اویس علی شاہ کو ان کے گھر پہنچا دیا گیا۔ نجی ٹی وی کے مطابق ڈی جی رینجرز میجر جنرل بلال اکبر اویس شاہ کو لے کر ان کے گھر پہنچے۔نجی ٹی وی کے مطابق اویس شاہ سے ملاقات کرنے والے جسٹس قاضی خالد کا کہنا ہے کہ اویس شاہ صحت مند اور بہت خوش ہیں۔یاد رہے کہ کچھ ہفتے پہلے اغوا کیا گیا تھا ۔

موضوعات:اویس شاہ چیف جسٹس سندھ ہائیکورٹ