لاہور /اسلام آباد ( این این آئی) وزیراعظم محمد نواز شریف ٹانگ کے زخم میں انفیکشن کے باعث بخار میں مبتلا ہو گئے اور ان کی اسلام آباد روانگی ملتوی کر دی ۔ ترجمان وزیراعظم ہاؤس کی جانب سے جاری کیے گئے ایک بیان میں کہا گیا کہ وزیراعظم نواز شریف جو اِن دنوں لاہور میں مقیم ہیں نے منگل 19جولائی کو اسلام آباد آنا تھا، تاہم ٹانگ کے زخم میں انفیکشن اور بخار کے باعث وہ اسلام آباد نہیں آسکیں گے۔ترجمان کا کہنا تھا کہ وزیراعظم نواز شریف نے اسلام آباد آکر کئی اجلاسوں کی صدارت بھی کرنی تھی تاہم اب ڈاکٹروں نے وزیراعظم کی ٹانگ کے انفیکشن کا علاج شروع کر دیا ہے اور وزیر اعظم کا بخار کم کرنے کی کوشش کی جا رہی ہے علاج کے بعد وزیراعظم صحتیاب ہوتے ہی اسلام آباد پہنچیں گے۔یاد رہے کہ رواں برس 31مئی کو لندن کے ایک ہسپتال میں وزیراعظم نواز شریف کی کامیاب اوپن ہارٹ سرجری ہوئی تھی۔آپریشن کے بعد شہباز شریف نے بتایا تھا کہ نواز شریف کے دل کا آپریشن کامیاب رہا اور ان کے 4بائی پاس ہوئے۔بعدازاں ڈاکٹروں سے سفر کی اجازت ملنے کے بعد رواں ماہ 9جولائی کو وزیراعظم اپنے اہلِ خانہ کے افراد کے ہمراہ پاکستان انٹرنیشنل ایئرلائنز کے خصوصی طیارے کے ذریعے وطن واپس پہنچے ہیں۔