اسلام آباد(این این آئی) وزیراعظم نواز شریف کی صاحبزادی مریم نواز نے حکمران جماعت مسلم لیگ (ن) کے ناراض اراکینِ اسمبلی کو یقین دلایا ہے کہ ان کی شکایات ان کی توقعات کے مطابق بروقت سنی جائیں گی۔مریم نواز نے وزیراعظم ہاؤس میں قانون سازوں اور کابینہ اراکین سے ملاقات کے دوران قومی اسمبلی کے ناراض اراکین سے تمام ترقیاتی منصوبوں کی تکمیل کیلئے تعاون کا وعدہ کیا۔واضح رہے کہ مریم نواز حکومت میں کوئی سرکاری عہدہ نہیں رکھتیں ٗانھیں وزیراعظم یوتھ لون اسکیم کا سربراہ مقرر کیا گیا تھا تاہم لاہور ہائی کورٹ کے حکم کے بعد مریم کو وہ عہدہ چھوڑنا پڑاجس میں ان کی تعلیمی اسناد کے بارے میں سوال کیا گیا تھاجھنگ سے قومی اسمبلی کے رکن نجف عباس سیال نے بتایا کہ مریم نواز نے ہمیں یقین دلایا کہ وہ آئندہ ذاتی طور پر بروقت ہماری شکایت سنیں گی اور پارٹی کے تمام کارکنوں کے مسائل پر خاص توجہ دیں گی۔ایک سوال کے جواب میں انہوں نے کہا کہ مجھے اور ساتھی اراکین کو خاص کانٹیکٹ نمبرز دیئے گئے ہیں تاکہ ہم کسی بھی وقت اپنے مسائل کے حوالے سے ان سے رابطہ کرسکیں تاہم نجف عباس سیال نے اس تاثر کو رد کردیا کہ پاکستان مسلم لیگ (ن) مختلف دھڑوں میں بٹ چکی ہے اور وہ اس فاروڈر بلاک کا حصہ بن گئے ہیں۔ایک سوال پر انہوں نے کہاکہ ہمیں کچھ مسائل کی وجہ سے شکایتیں تھیں تاہم فاروڈر بلاک کے حوالے سے سامنے آنے والی خبروں میں کوئی صداقت نہیں قومی اسمبلی کے ایک رکن نے نام نہ ظاہر کرنے کی شرط پر نجی ٹی وی کو بتایا کہ اجلاس کا مقصد وزیر اعظم کے لندن میں قیام میں توسیع کے حوالے سے تمام اراکین کو اعتماد میں لینا تھا۔انہوں نے کہا کہ وزیراعظم کی صحت یابی اور وزیراعظم ہاؤس میں تبدیلی کے حوالے سے کچھ حکومتی ناقدین افواہیں پھیلانے میں مصروف ہیں، ہمیں اجلاس میں بتایا کہ ملکی حالات قابو میں ہیں اور وزیراعظم عید کے بعد وطن لوٹیں گے۔انہوں نے اعتراف کیا کہ پاکستان مسلم لیگ (ن) کے دور اقتدار میں آنے کے 3 سال بعد بھی ترقیاتی منصوبے تعطل کا شکار ہیں تاہم پارٹی رہنما خاص طور پر مریم نواز نے ان منصوبوں کو جلد مکمل کرنے کیلئے ساتھ دینے کا یقین دلایا ۔