اسلام آباد (مانیٹرنگ ڈیسک) وزیراعظم نواز شریف کی صاحبزادی مریم نواز نے مسلم لیگ (ن) کے50کے قریب ناراض اراکین اسمبلی کومنالیا اور یقین دلایا کہ ان کے علاقوں کے مسائل حل کئے جائیں گے،جاری ترقیاتی منصوبوں کو پایہ تکمیل پر پہنچایا جائے گا، تمام ناراض اراکین کی شکایات ان کی توقعات کے مطابق بروقت سنی جائیں گی۔ وزیراعظم کی بیٹی مریم نواز سے وزیراعظم ہاؤس میں قومی اسمبلی کے ناراض اراکین نے ملاقات کی۔ ناراض ایم این ایزمیں جھنگ سے قومی اسمبلی کے رکن نجف عباس سیال،پارلیمانی سیکرٹری برائے دفاع امور چوہدری جعفر اقبال ، راؤ اجمل، رانا حیات خان، چوہدری عبدالرحمان، حاجی اکرم انصاری، شیخ فیاض و دیگر ارکان شامل ہیں
۔ملاقات کے دوران مریم نواز نے ناراض اراکین اسمبلی کو یقین دلایا کہ ان کی شکایات ان کی توقعات کے مطابق بروقت سنی جائیں گی، ان کے علاقوں کے مسائل حل کئے جائیں گے اور وعدہ کیا کہ جاری ترقیاتی منصوبوں کو پایہ تکمیل پر پہنچایا جائے گا۔بعد ازاں پیر کو میڈیا سے گفتگو کرتے ہوئے جھنگ سے قومی اسمبلی کے رکن نجف عباس سیال نے کہا کہ وزیر کیڈ ڈاکٹر طارق فضل چوہدری، وزیر دفاع خواجہ محمد آصف، وزیر تعلیم میاں بلیغ الرحمان کے علاوہ ہمارا کوئی ٹیلیفون ہی نہیں سنتا اور نہ ہی ہم سے ملاقات کرتے ہیں۔ انہوں نے کہا کہ مریم نواز نے ہمیں یقین دلایا کہ وہ آئندہ ذاتی طور پر بروقت ہماری شکایت سنیں گی اور پارٹی کے تمام کارکنوں کے مسائل پر خاص توجہ دیں گی۔انہوں نے کہا کہ مجھے اور ساتھی اراکین کو خاص رابطہ نمبرز دیئے گئے ہیں تاکہ ہم کسی بھی وقت اپنے مسائل کے حوالے سے ان سے رابطہ کرسکیں۔نجف عباس سیال نے اس تاثر کو رد کردیا کہ پاکستان مسلم لیگ (ن) مختلف دھڑوں میں بٹ چکی ہے اور وہ اس فاروڈر بلاک کا حصہ بن گئے ہیں۔