کراچی (مانیٹرنگ ڈیسک)کراچی میں سول اور عسکری قیادت کے اجلاس میں آخری دہشتگردکے خاتمے تک ٹارگٹڈآپریشن جاری رکھنے اورآپریشن پرکسی قسم کاکوئی سمجھوتہ نہ کرنے کافیصلہ کیاگیا،دہشتگردوں اورسہولت کاروں کے خلاف کارروائیاں تیز کرنے پراتفاق کیاگیا۔آرمی چیف جنرل راحیل شریف نے کہاکہ کراچی آپریشن اہم مرحلے میں داخل ہوگیاہے ،دہشتگردحوصلہ ہارچکے ہیں ،تمام ادارے مل کردہشتگردوں کوکچل دیں ۔میڈیارپورٹس کے مطابق کراچی میں امن وامان کے حوالے سے کورہیڈکوارٹرمیں اہم اجلاس ہوا،جس میں آرمی چیف جنرل راحیل شریف ،ڈی جی آئی ایس آئی ،کورکمانڈرکراچی ،وفاقی وزیرداخلہ چوہدری نثارعلی خان ،گورنرسندھ عشرت العباد،وزیراعلیٰ سندھ سیدقائم علی شاہ اوروزیرداخلہ سندھ نے شرکت کی۔
اجلا س میں دہشتگردوں کوجڑسے اکھاڑنے کافیصلہ کیاگیا۔اویس شاہ کی بازیابی کیلئے تمام وسائل بروئے کارلانے کافیصلہ کیاگیا۔آرمی چیف نے کہاکہ دہشتگردوں کے سہولت کاروں اورہمدردوں کاگٹھ جوڑتوڑاجائیگا،دہشتگردآسان اہداف کونشانہ بنارہے ہیں ،دہشتگردوں کے منصوبوں کوکامیاب حکمت عملی سے ناکام بنائیں گے ،دہشتگردوں کامقصدمعاشرے کونفسیاتی طورپرمتاثرکرناہے ،دہشتگردی کے خاتمے کیلئے متفقہ قومی سوچ کی ضرورت ہے ۔کراچی آپریشن سے دہشتگردوں کوکاری ضرب لگائی گئی۔