اسلام آباد (مانیٹرنگ ڈیسک) حکومت بند گلی میں داخل ہو گئی‘ پاکستان تحریک انصاف کے بعد پاکستان پیپلزپارٹی نے وزیر اعظم سمیت پانچ مسلم لیگی رہنماؤں کی نااہلی کا ریفرنس تیار کر لیا پیپلزپارٹی کے سیکرٹری جنرل لطیف کھوسہ پیر کو الیکشن کمیشن میں ریفرنس دائر کریں گے ۔تفصیلات کے مطابق تحریک انصاف کے بعد پیپلزپارٹی نے بھی وزیر اعظم کی نااہلی کے لئے الیکشن کمیشن کا دروازہ کھٹکھٹائی گی پیپلزپارٹی کے سیکرٹری جنرل لطیف کھوسہ پیر کے روز الیکشن کمیشن میں وزیر اعظم نواز شریف سمیت مسلم لیگ نواز کے پانچ رہنماؤں اسحاق ڈار ، شہباز شریف ، حمزہ شہباز اور کیپٹن( ر) صفدر کی نااہلی کے لئے ریفرنس دائر کریں گے ۔ذرائع کے مطابق پی ٹی آئی کے بعد پی پی کے اس اقدام سے حکومتی صفوں میں کھلبلی مچ گئی ہے۔ پیپلزپارٹی کے سیکرٹری جنرل لطیف کھوسہ نے کہا کہ پیر کے روز پیپلزپارٹی کی جانب سے وزیر اعظم اور رہنماؤں کی نااہلی کے لئے الیکشن کمیشن میں ریفرنس دائر کریں گے۔
ریفرنس میں موقف اختیار کیا جائے گا کہ وزیر اعظم نے اہلیہ اور بچوں کے غلط اثاثے ظاہر کئے اور وزیر اعظم نے انکم ٹیکس گوشواروں کی تفصیل جو الیکشن کمیشن میں 1985 سے جمع کروا رہے ہیں ان میں غلط بیان کی ہے ۔ وزیر اعظم اور ان کے ساتھیوں نے پیسہ منی لانڈرنگ کے ذریعے ملک سے باہر بھیجے جو قانوناً جرم ہے اور بینک ڈیفالٹ سے متعلق اسٹیٹ بنک کا خط بھی ریفرنس کا حصہ ہو گا انہوں نے کہا کہ ہم نے تمام ثبوت ریفرنس میں فراہم کر دیئے ہیں لہذا وزیر اعظم نواز شریف ، اسحاق ڈار ، شہباز شریف ، حمزہ شبہاز اور کیپٹن(ر) صفدر آئین کے آرٹیکل 62، 63 پر پورا نہیں اترے ۔ الیکشن کمیشن ان تمام افراد کی رکنیت ختم کر کے نااہل قرار دے ۔واضح رہے کہ اس سے قبل پاکستان تحریک انصاف بھی وزیر اعظم کی نا اہلی کا ریفرنس الیکشن کمیشن میں دائر کر چکی ہے۔