اسلام آباد (این این آئی)صدر مملکت ممنون حسین ٗوزیر اعظم محمد نواز شریف ٗ وزیر داخلہ چوہدری نثار علی خان نے معروف قوال امجد صابری کے قتل کے واقعہ کی پرزور مذمت کرتے ہوئے مرحوم کے اہلخانہ سے دلی تعزیت کا اظہار کیا ہے۔ صدر نے اپنے تعزیتی پیغام میں امجد صابری کے قتل پر گہرے دکھ اور افسوس کا اظہار کرتے ہوئے متعلقہ حکام کو ہدایت کی کہ قاتلوں کو جلد از جلد گرفتار کرکے کیفر کردار تک پہنچایا جائے۔ وزیراعظم محمد نواز شریف نے کراچی میں دہشت گرد حملہ کی پرزور مذمت کی ہے جس میں شہرت یافتہ قوال امجد صابری جاں بحق ہو گئے۔ وزیراعظم نے دعا کی کہ اﷲ تعالیٰ مرحوم کو اپنے جوار رحمت میں جگہ دے اور لواحقین کو یہ حوصلہ برداشت کرنے کا حوصلہ عطاء فرمائے۔ وزیراعظم نے متعلقہ حکام کو ہدایت کی کہ اس حملہ کے پس پردہ عناصر کا سراغ لگا کر انہیں کیفر کردار تک پہنچایا جائے۔ انہوں نے مرحوم امجد صابری کی ملک میں قوالی کے فروغ کیلئے خدمات کو سراہتے ہوئے کہا کہ آنے والے وقتوں میں انہیں یاد رکھا جائے گا۔ وزیر داخلہ چوہدری نثار علی خان نے مشہور قوال امجد صابری پر حملہ کی پرزور مذمت کی ہے انہوں نے اس افسوسناک واقعہ پر گہرے رنج و غم کا اظہار کیا۔ وزیر داخلہ نے تعزیت کا اظہار کرتے ہوئے ان کی موت کو بہت بڑا نقصان قرار دیا۔ انہوں نے دعا کہ اﷲ تعالیٰ مرحوم کو اپنے جوار رحمت میں جگہ دے اور لواحقین کو یہ صدمہ برداشت کرنے کا حوصلہ عطاء کرے۔وفاقی وزیر اطلاعات، نشریات و قومی ورثہ سینیٹر پرویز رشید نے معروف قوال امجد صابری کے قتل کی شدید مذمت کی ہے۔ اپنے ایک بیان میں انہوں نے کہا کہ امجد صابری کے قتل سے ہم سماع اور نعت کی دنیا میں ایک عظیم آواز سے محروم ہو گئے ہیں۔ انہوں نے حکومت سندھ پر زور دیا کہ اس واقعہ کا فوری نوٹس لیا جائے اور مجرموں کو جلد گرفتار کیا جائے۔ وزیر اطلاعات نے سوگوار خاندان سے بھی دلی تعزیت کا اظہار کیا۔