اسلام آباد(مانیٹرنگ ڈیسک)نجی ٹی وی کے پروگرام میں سینئر سیاستدان نے لودھراں میں وزیر اعظم کے ترقیاتی پیکج کا پول کھول دیا‘ تحریک انصاف کے مرکزی رہنما اور لودھراں سے ممبر قومی اسمبلی جہانگیر ترین نے کہا کہ وزیر اعظم نواز شریف نے لودھراں الیکشن سے قبل لودھراں کی عوام کیلئے اڑھائی ارب روپے کے ترقیاتی پیکجز کا اعلان کیا تھا، جب میں الیکشن جیتا تو فوراََ قومی اسمبلی میں میں اس پیکج کا ذکر کیا کہ یہ عوام کے ٹیکسز کے پیسے ہیں یہ اس شرط پر نہیں دیئے جانے تھے کہ پاکستان مسلم لیگ (ن) کا امیدوار الیکشن جیتے گا، آپ پورے ملک کے وزیر اعظم ہیں اور آپ نے اعلان کیا ہے، پیسے دیئے جائیں۔ اس کے بعد میں نے اسحاق ڈار کو خط لکھا اور پوری تفصیل پیش کی ‘ اسحاق ڈار کا جواب آیا کہ فنڈ ریلیز کا کام وفاقی وزیر احسن اقبال کرتے ہیں اور ہم صرف پیسے دیتے ہیں اسلئے احسن اقبال سے رابطہ کیا جائے، نجی ٹی وی کے اسی پروگرام میں وفاقی وزیر احسن اقبال بھی شریک تھے جب ان سے یہ سوال پوچھا گیا تو انہوں نے کہا کہ اس ضمن میں ہمیں کوئی’’ہدایات‘‘ موصول نہیں ہوئیں ‘ اگر کوئی ہدایات آ جائیں گی تو ہم ضرور یہ پیکج جاری کریں گے۔ جس پر سینئر تجزیہ نگار و میزبان حامد میر نے احسن اقبال سے سوال کیا کہ یہ کیسی بات ہوئی کہ وزیراعظم نے اڑھائی ارب پیکج کا اعلان کیا اور اس کی ہدایات آپ کی وزارت تک نہیں پہنچی‘ اس کا مطلب ہے کہ حکومتی معاملات میں شدید گڑ بڑ ہے۔