لندن ( آئی این پی) وزیر اعظم نواز شریف اوپن ہارٹ سرجری کی کامیابی کے بعد ہوش میں آگئے ، ڈاکٹروں نے وزیر اعظم کی اہلیہ اور بچوں کو دیکھنے کی اجازت دیدی ۔ منگل کو نجی ٹی وی کے مطابق وزیر اعظم نواز شریف کی لندن کے نجی ہسپتال ہارلے سٹریٹ کلینک میں اوپن ہارٹ سرجری کی گئی ۔ سرجری کا عمل تقریباً ساڑھے4 گھنٹے جاری رہا ۔ سرجری کے موقع پر وزیر اعظم کے بھائی اور وزیر اعلیٰ پنجاب شہباز شریف ، وزیر اعظم کے صاحبزادے حسین نواز اور حسن نواز سمیت فیملی کے دیگر اراکین ہسپتال میں موجود رہے اور وزیر اعظم کی کامیاب سرجری کی دعائیں کرتے رہے ۔ سرجری کے کامیاب آپریشن کے بعد وزیر اعظم نواز شریف کو انتہائی نگہداشت کی وارڈ ( آئی سی یو ) میں شفٹ کیا گیا جہاں پاکستانی وقت کے مطابق رات 9 بجے کے قریب وزیر اعظم کو ہوش آنا شروع ہو گیا جس کے بعد ڈاکٹروں نے وزیر اعظم کی اہلیہ اور بچوں کو انہیں دیکھنے کی اجازت دیدی ۔