نوشکی (این این آئی) نوشکی میں ڈرون حملہ،پاکستان کی پالیسی میں واضح تبدیلی،امریکی حکام کیخلاف بڑا قدم اُٹھالیاگیا،بلوچستان کے علاقے نوشکی میں ہونے والے ڈرون حملے کی ایف آئی آر لیویز کے مال تھانہ میں درج کرلی گئی ۔ اتوار کو ایف آئی آرڈرائیورمحمداعظم کے بھائی محمد قاسم کی مدعیت میں درج کرائی گئی جس میں امریکی حکام کو نامزد کیا گیا ۔ ایف آئی آرمیں 3،4،5ایکسپلوزیواور7 اے ٹی اے ، 302،109، 427 کی دفعات شامل کی گئی ہیں۔ایف آئی آر میں کہا گیا کہ میڈیا میں امریکی حکام نے واقعہ کی ذمہ داری قبول کی۔محمداعظم کے بھائی محمد قاسم نے ایف آئی میں موقف اختیار کیا کہ میرابھائی بے گناہ تھا، اس کے چار چھوٹے چھوٹے بچے ہیں ٗوہ گھرکاواحد کفیل تھا۔ محمد اعظم کے بھائی نے حملے میں ملوث حکام کیخلاف کارروائی کا مطالبہ کیا۔ڈرون حملے میں ہلاک ہونے والے ڈرائیور محمد اعظم کے چچا حاجی خدائے نذر نے بتایا کہ ہمیں انصاف چاہیے۔خدائے نذر کا کہنا تھا کہ ہم ڈرون حملہ کرنے والوں کو انصاف کے کٹہرے میں دیکھنا چاہتے ہیں ٗمیرا بھتیجا محمد اعظم مکمل طور پر بے قصور تھا۔انہوں نے کہا کہ اس کے کسی بھی دہشت گرد گروہ سے کوئی تعلقات نہیں تھے۔واضح رہے کہ 21 مئی کو بلوچستان میں پاک افغان سرحد کے قریب 2 افراد کی جلی ہوئی لاشیں برآمد ہوئی تھیں، جن کی فوری طور پر شناخت نہ ہو سکی تھی تاہم ان کی لاشیں کوئٹہ کے سول ہسپتال منتقل کی گئیں، جہاں ان کی شناخت ولی محمد اور محمد اعظم کے نام سے ہوئی تھی، ٹیکسی ڈرائیور محمد اعظم بلوچستان کے علاقے تفتان کا رہائشی تھا شناخت کے بعد اس کی لاش اہل خانہ کے حوالے کر دی گئی تھی۔محمد اعظم کے اہل خانہ نے بتایا تھا وہ اپنی ٹیکسی میں ایک ہی سواری کو تفتان سے لے کر روانہ ہوا تھا۔واضح رہے کہ ڈرون حملے اس سے قبل بھی بہت بار ہوچکے ہیں مگر ڈرون حملے کے بعد مقدمے کا اندراج خاص اہمیت کاحامل ہے۔