اسلام آباد(مانیٹرنگ ڈیسک)امریکہ سے F-16 طیاروں کی خریداری کا معاملہ ‘ پاکستان کا ایف سولہ طیاروں کی خریداری کا اہم معاہدہ ختم ہو گیا۔ پاکستان نے امریکہ سے 8 ایف سولہ طیارے خریدنے تھے ۔رپورٹ کے مطابق امریکہ کی پیشکش پر پاکستانی حکومت نے 24 مئی تک جیٹ طیاروں کی خریداری کے لیے امریکہ کو جواب دینا تھا،تاہم پیشکش کے خاتمے تک یہ جواب نہیں دیا گیا۔ ۔واضح رہے کہ امریکا کی حکومت نے کانگریس کو آگاہ کیا تھا کہ 8 ایف سولہ طیارے پاکستان کو فراہم کرنے کا منصوبہ ترتیب دیا گیا ہے‘ پاکستان نے ایف 16 طیارے حاصل کرنے کے لیے 70کروڑ ڈالر ادا کرنے تھے جن میں سے امریکا نے 43 کروڑ ڈالر کی امداد شامل کرنی تھی، اس طرح پاکستان کے ذمہ واجب الادا رقم 27 کروڑ ڈالر تھی۔تاہم کانگریس نے پاکستان کو ایف 16 دینے کی مخالفت کی۔پاکستان نے فیصلہ کیا تھا کہ اس سلسلے میں تمام رقم قومی فنڈز سے نہیں لی جائیگی، لہٰذا طیاروں کی فروخت کیلئے شرائط کی مدت اب ختم ہوگئی ہے ‘کانگریس کا کہنا ہے کہ پاکستان نے حقانی نیٹ ورک کے خلاف موثر کارروائیاں نہیں کیں۔امریکہ نے پاکستان کے جوہری پروگرام خاص کر ٹیکٹیکل ہتھیاروں اور شاہین 3 میزائل پر بھی تحفظات کا اظہار کیا گیا۔بعدازاں پاکستان سے کہا گیا کہ وہ ان طیاروں کی مکمل رقم خود اپنے وسائل سے ادا کرے، جسے پاکستانی حکام نے تسلیم نہیں کیا اور کہا کہ انھیں یہ پیشکش پیشگی شرائط کے ساتھ قبول نہیں ہے۔‎