اسلام آباد(نیوز ڈیسک) شمالی وزیرستان کے علاقے شوال میں امریکی جاسوس طیارے کے حملے میں چار مبینہ دہشت گرد ہلاک ہو گئے ہیں۔ ذرائع کا کہنا ہے کہ جاسوس طیارے نے شوال کے علاقے میں دہشت گردوں کے ایک ٹھکانے پر دو میزائل داغے۔ذرائع کا مزید کہنا ہے کہ ہلاک ہونے والے چار دہشت گردوں کو تعلق کالعدم تحریک طالبان پاکستان کے سجنا گروپ سے ہے۔یاد رہے کہ پشاور میں 16 دسمبر کو ارمی پبلک اسکول پر ہونے والے حملے کے بعد ارمی چیف جنرل راحیل شریف نے افغانستان کا دورہ کیا تھا جس میں افغان حکام کے ساتھ عسکریت پسندوں کے خلاف کارروائی تیز کرنے کا فیصلہ کیا گیا تھا۔پاکستان کی جانب سے ڈرون حملوں کو ہمیشہ خود مختاری کی خلاف ورزی قرار دیا گیا ہے اور امریکا سے یہ حملے بند کرنے کا بھی مطالبہ کیا جاتا رہا ہے۔واضح رہے کہ پاکستان کو 2004 سیقبائلی علاقوں میں شدت پسند گروپوں کی مزاحمت کا سامنا ہے۔وفاق کے زیرِ انتظام پاک افغان سرحد پر واقع شمالی وزیرستان، جنوبی وزیرستان اور خیبر ایجنسی سمیت سات ایجنسیوں کو عسکریت پسندوں کی محفوظ پناہ گاہ سمجھا جاتا ہے۔حکومت اور کالعدم تحریک طالبان پاکستان کے درمیان امن مذاکرات کی ناکامی اور کراچی ایئرپورٹ پر حملے کے بعد پاک فوج نے رواں برس 15 جون کو شمالی وزیرستان میں اپریشن ضربِ عضب شروع کیا تھا۔