اسلام آباد(نیوز ڈیسک)پیرس: فرانس نے سعودی عرب کی اہم بندرگاہ ینبع کی سکیورٹی مزید مضبوط بنانے کے لیے فوجی اہلکاروں سمیت ریڈار اور دفاعی نظام تعینات کرنے کا فیصلہ کیا ہے۔
فرانسیسی صدر ایمانویل میکخواں کے مطابق سعودی حکام سے مشاورت کے بعد ینبع میں اضافی دفاعی وسائل بھیجنے پر اتفاق کیا گیا ہے۔ ان کا کہنا ہے کہ ان اقدامات کا مقصد اہم تیل تنصیبات اور بندرگاہ کو ممکنہ حملوں سے محفوظ رکھنا ہے۔غیر ملکی خبر رساں ادارے کے مطابق صدر میکخواں نے ایک انٹرویو میں بتایا کہ فرانس ینبع میں فوجی اہلکاروں کے ساتھ ساتھ نگرانی کے لیے ریڈارز اور دفاعی نظام بھی فراہم کرے گا۔فرانسیسی صدر نے کہا کہ بحیرۂ احمر کے ساحل پر واقع ینبع سعودی عرب کے لیے انتہائی اہم بندرگاہ ہے، جہاں سے روزانہ لاکھوں بیرل تیل کی ترسیل ہوتی ہے۔ حالیہ حملوں کے باعث اس اہم تنصیب کو نقصان بھی پہنچا ہے۔
ایمانویل میکخواں نے واضح کیا کہ فرانس کی جانب سے فوجی وسائل کی تعیناتی کا مقصد کسی جنگ یا براہِ راست عسکری تنازع کا حصہ بننا نہیں بلکہ اہم تنصیبات کے تحفظ میں مدد فراہم کرنا ہے۔انہوں نے مزید کہا کہ فرانس خطے میں کشیدگی کم کرنے کے لیے سفارتی کوششوں کو ترجیح دے رہا ہے اور آبنائے ہرمز کو مکمل طور پر کھولنے کے لیے سفارتی سطح پر اقدامات جاری رکھے گا۔
