اسلام آباد (نیوز ڈیسک) امریکا سے جرمنی جانے والی ایک پرواز میں خوفناک واقعہ پیش آیا جہاں ایک بھارتی شہری نے دورانِ پرواز دو کم عمر لڑکوں پر حملہ کر کے انہیں زخمی کر دیا۔امریکی میڈیا کے مطابق، ملزم نے نہ صرف دو نوجوانوں کو کانٹے سے زخمی کیا بلکہ ایک خاتون مسافر اور عملے کے رکن پر بھی حملے کی کوشش کی، جس کے باعث طیارے کو ہنگامی طور پر بوسٹن ایئرپورٹ پر اتارنا پڑا۔ایف بی آئی کے مطابق، یہ واقعہ ہفتے کے روز شکاگو سے روانہ ہونے والی پرواز میں پیش آیا۔ پرواز کے دوران جب کھانا پیش کیا گیا تو ایک 17 سالہ لڑکا سو گیا تھا۔

اچانک اس کی آنکھ کھلی تو اس نے دیکھا کہ ملزم پرنیت کمار اس کے اوپر جھکا ہوا ہے، اور اسی لمحے ملزم نے دھات کے کانٹے سے اس کے بائیں کندھے پر حملہ کیا۔اس کے فوراً بعد ملزم نے ساتھ والی سیٹ پر بیٹھے دوسرے 17 سالہ لڑکے کے سر پر وار کیا، جس سے اس کے سر کے پچھلے حصے پر زخمی ہونے کا نشان پڑ گیا۔جب پرواز کے عملے نے حملہ آور کو قابو کرنے کی کوشش کی تو اس نے اپنی انگلیوں سے بندوق کا اشارہ بنایا اور منہ میں رکھ کر ایسے ظاہر کیا جیسے وہ خود کو گولی مارنے والا ہو۔ اسی دوران، اس نے اپنے قریب بیٹھی ایک خاتون کو تھپڑ مارا اور ایک فلائٹ اٹینڈنٹ پر بھی حملے کی کوشش کی۔امریکی پراسیکیوٹرز کے مطابق، 28 سالہ بھارتی شہری پر “خطرناک ہتھیار سے نقصان پہنچانے کی نیت سے حملہ” کرنے کا مقدمہ درج کیا گیا ہے۔ اگر جرم ثابت ہو گیا تو اسے 10 سال قید اور 2 لاکھ 50 ہزار ڈالر تک جرمانہ ہو سکتا ہے۔