اسلام آباد (نیوز ڈیسک) سعودی عرب کی وزارت افرادی قوت نے نجی اور غیر منافع بخش اداروں کے لیے عید الفطر کی تعطیلات کا اعلان کر دیا ہے۔
رمضان المبارک کا مقدس مہینہ دنیا بھر میں جاری ہے اور پہلا عشرہ مکمل ہو چکا ہے۔ دیگر اسلامی ممالک کی طرح سعودی عرب میں بھی روزے رکھنے کے ساتھ ساتھ عید الفطر کے لیے تیاریاں زور و شور سے جاری ہیں۔
عید الفطر سعودی عرب میں ممکنہ طور پر 30 یا 31 مارچ کو منائی جائے گی، جس کا حتمی فیصلہ چاند کی رویت پر ہوگا۔ تاہم، سعودی وزارت افرادی قوت نے پہلے ہی نجی اور غیر منافع بخش اداروں کے لیے عید کی تعطیلات کا اعلان کر دیا ہے۔
مقامی اخبار اخبار 24 کے مطابق، وزارت نے عید الفطر کے سلسلے میں چار دن کی سرکاری چھٹیوں کا اعلان کیا ہے۔ یہ تعطیلات اتوار 30 مارچ سے شروع ہو کر 2 اپریل تک جاری رہیں گی۔
اس کے علاوہ، عید الاضحیٰ کے موقع پر چھ دن کی تعطیلات کا اعلان بھی کیا گیا ہے۔ یہ چھٹیاں 9 ذوالحجہ 1446ھ، یعنی 5 جون 2025 سے شروع ہوں گی اور 10 جون 2025 تک جاری رہیں گی۔
رپورٹ کے مطابق، مکہ مکرمہ، مدینہ منورہ اور سرحدی علاقوں میں حج و عمرہ زائرین کی سہولت کے پیش نظر مخصوص برانچیں دوران تعطیلات بھی معمول کے مطابق کام کرتی رہیں گی تاکہ زائرین کو کسی قسم کی دشواری کا سامنا نہ ہو۔
