کویت سٹی (این این آئی)کویت میں حکام کی جانب سے 1785 افراد کی شہریت واپس لینے کے احکامات صادر کیے گئے ہیں، دو معروف فنکاروں کی بھی شہریت واپس لے لی گئی ہے۔بین الاقوامی خبر رساں ادارے کی رپورٹ کے مطابق کویت میں حکام کا کہنا تھا کہ گلوکارہ نوال الکویتیہ اور فنکار داود حسین سے بھی شہریت واپس لی گئی ہے۔ان افراد کی شہریت کے حوالے سے کویتی اعلی کمیٹی کی جانب سے کی گئی تحقیقات کے بعد 1758 افراد کے بارے میں رپورٹ پیش کی تھی کہ انہیں جو شہریت دی گئی تھی وہ ضوابط کے مطابق نہیں تھی۔

رپورٹس کے مطابق شہریت کمیٹی کی جانب سے ان افراد کے بارے میں انتہائی باریک بینی سے تحقیقات کی جارہی ہیں جنہیں کویتی شہریت جاری کی گئی تھی۔متعلقہ کمیٹی کی رپورٹ میں جن افراد کی شہریت واپس لینے کی سفارش کی گئی ہے اس میں کہا گیا تھا کہ شہریت جاری کرتے وقت قانونِ شہریت کے نکات کو مدنظر نہیں رکھا گیا تھا جس کے باعث وہ مطلوبہ معیار پر پورا نہیں اترے۔کمیٹی کی جانب سے سفارش کی گئی کہ اعلی خدمات کی مد میں جنہیں شہریت دی گئی تھی وہ اس کے اہل نہیں ہیں اسی لیے انکی شہریت منسوخ کی جائے۔