نیویارک (این این آئی)رشوت اور غیر قانونی فنڈز لینے کے مقدمے میں امریکی شہر نیویارک کے میئر پر فردِ جرم عائد کردی گئی۔غیرملکی میڈیا کے مطابق نیویارک سٹی کے میئر ایرک ایڈمز کو وفاقی عدالت میں پیش کیا جائے گا، ان کو 5 مجرمانہ الزامات کا سامنا ہے۔ جرم ثابت ہونے پر کئی دہائیوں تک ایرک ایڈمز کو جیل میں رہنا پڑ سکتا ہے۔

میئر ایرک ایڈمز کا کہنا تھا کہ تمام الزامات غلط ہیں، استعفی دینے کے مطالبات کو مسترد کرتا ہوں۔دوسری جانب پراسیکیوٹر کا کہنا تھا کہ 2021 میں ایرک نے ترک شہریوں سے پرتعیش ہوٹلز میں قیام اور مہنگے ریسٹورنٹس میں دعوتیں قبول کیں اور اس کے عوض انہوں نے سیکیورٹی خدشات کے باوجود قونصل خانے کی عمارت کھولنے پر دباو ڈالا۔