بیجنگ (آن لائن) چین کے شہر ووہان میں کورونا سے ہونے والی ہلاکتوں میں 1290 اموات کا مزید اضافہ۔ ووہان میں ہونے والی کل اموات کے ریکارڈ میں 1290 اموات کے اضافے پر چینی حکام کا کہنا ہے کہ یہ وہ اموات ہیں جو تاخیر کا شکار ہونے یا بھول کے باعث رپورٹ نہ ہونے سے ریکارڈ کا حصہ نہ بن پائیں۔ تفصیلات کے مطابق چین کے شہر ووہان میں مہلک کورونا وائرس سے ہونے والی
کل ہلاکتوں کی تعداد میں 1290 ہلاکتوں کا مزید اضافہ ہو چکا ہے۔میڈیاکے مطابق چینی حکام نے جمعہ کے روز ووہان شہر میں مہلک وائرس سے ہونے والی ہلاکتوں کے ریکارڈ میں 1290 ہلاکتوں کا مزید اضافہ کیا ہے۔ رپورٹس کے مطابق ہلاکتوں کے علاوہ 325 نئے کیسز کا بھی اضافہ کیا گیا ہے۔ رپورٹس کے مطابق ہلاکتوں کے ریکارڈ میں 1200 سے زائد اموات کے اضافے کے بعد وائرس کا مرکز سمجھے جانے والے چین کے شہر ووہان میں کورونا سے ہونے والی ہلاکتوں کی کل تعداد 3869 ہو گئی ہے جبکہ وائرس سے متاثرہ افراد کی تعداد 50 ہزار 333 ہو چکی ہے۔میڈیارپورٹ کے مطابق ووہان شہر کے حکام کا کہنا تھا کہ تاخیر کا شکار ہونے کی وجہ سے رپورٹ نہ ہونے والی اموات کو ریکارڈ کا حصہ بنانا ضروری تھا۔ واضح رہے کہ چینی شہر ووہان سے شروع ہونے والے کورونا وائرس سے دنیا بھر میں اب تک متاثرہ افراد کی تعداد 21 لاکھ 82 ہزار سے زائد ہو چکی ہے جبکہ اس مہلک وائرس سے ہلاک افراد کی تعداد 1 لاکھ 45 ہزار 513 ہو گئی ہے جبکہ 56 ہزار 595 افراد کی حالت انتہائی تشویشناک بتائی جا رہی ہے۔
