ماسکو(این این آئی)روس کے دارالحکومت ماسکو میں کرونا وائرس کے مریضوں کے علاج کے لیے قائم کردہ نئے اسپتال کے سربراہ ڈاکٹر ڈینس پروتسینکو خود اس مہلک مرض کا شکار ہوگئے ہیں اور ان کے کرونا وائرس کے ٹیسٹ کی رپورٹ مثبت آئی ہے۔

انھوں نے ایک ہفتہ قبل روسی صدر ولادی میر پوتین سے مصافحہ کیا تھا۔تب صدر پوتین نے ماسکو میں قائم کردہ کومونرکا اسپتال کا دورہ کیا تھا۔میڈیارپورٹس کے مطابق کرونا وائرس کے ٹیسٹ مثبت آنے کے بعد ڈاکٹر پروتسینکو نے اسپتال میں واقع اپنے دفتر میں خود کو الگ تھلگ کرلیا ہے۔ان کا کہنا تھا کہ وہ بہتری محسوس کررہے ہیں۔تاہم کریملن نے ابھی تک ایسا کوئی بیان جاری نہیں کیا ،جس سے یہ ظاہر ہو کہ صدر پوتین نے بھی کرونا وائرس کا اپنا کوئی ٹیسٹ کرایا۔انھوں نے ڈاکٹر پروتسینکو سے 24 مارچ کو ملاقات کے وقت عام لباس زیب تن کررکھا تھا اور پیشگی حفاظتی تدابیر کو نظرانداز کیا تھا، جس پر انھیں سوشل میڈیا پر تنقید کا نشانہ بنایا گیا تھا۔البتہ انھوں نے اس ملاقات کے بعد اسپتال میں مریضوں کے کمروں میں جاتے وقت زرد رنگ کا حفاظتی سوٹ زیب تن کررکھا تھا۔روس نے کرونا وائرس کے 500 نئے کیسوں کی تصدیق کی ہے۔روس میں اس مہلک وَبا کے پھیلنے کے بعد ایک دن میں متاثرین کی یہ سب سے زیادہ تعداد ہے اور اب تک ملک میں کل متاثرہ افراد کی تعداد 2337 ہوچکی ہے۔