ابوظہبی (آن لائن) اماراتی ریاست ابوظہبی میں محکمہ صحت کی جانب سے شہر کے 2مشہور ہوٹلز خالی کروا کر انہیں بند کر دیا گیا ہے۔ یہ فیصلہ یہاں پر مقیم 2اطالوی سائیکلسٹ کے کرونا وائرس میں مبتلا ہونے کے انکشاف کے بعد لیا گیا ہے۔

تاکہ دیگر افراد اس موذی وائرس کا شکار ہونے سے بچ سکیں۔غیر ملکی خبر رساں ادارے کے مطابق ہفتہ کے روز محکمہ صحت کی جانب سے جاری اعلان میں کہا گیا ہے کہ یاس آئی لینڈ میں واقع دونوں ہوٹلز کی بندش کا فیصلہ کرونا وائرس کے پھیلاؤ کو روکنے کے لیے احتیاطی تدابیر کے طور پر کیا گیا ہے۔تاکہ ان ہوٹلز میں مقیم تمام مہمانوں کو کرونا وائرس سے محفوظ رکھا جا سکے۔ کیونکہ اس ہوٹل میں مقیم دو اطالوی ایتھلیٹ کرونا وائرس کے شکار پائے گئے تھے۔اس لیے خدشہ ہے کہ دیگر کھلاڑی اور مہمان بھی اس سے متاثر ہو سکتے ہیں۔دونوں ہوٹلز کو قرنطینہ کا درجہ دے کر دیگر لوگوں کے یہاں آنے پر پابندی عائد کر دی گئی ہے۔کرونا وائرس کے شکار دونوں اطالوی کھلاڑیوں کا علاج جاری ہے اور ان کی صحت کی خصوصی نگرانی کی جا رہی ہے۔جبکہ ہر وہ شخص جو دونوں اطالوی مریضوں سے رابطے میں رہا، اْس کے بھی ٹیسٹ لیے جا رہے ہیں اور ان کی نقل و حمل کو محدود کر دیا گیا ہے۔