واشنگٹن(این این آئی)امریکی محکمہ دفاع پینٹاگان نے اعلان کیا ہے کہ بغداد میں امریکی سفارت خانے پر حملے سے پیدا شدہ حالات کے پیش نظر مزید 750 امریکی فوجی جلد از جلد مشرق وسطیٰ بھیجے جارہے ہیں۔غیرملکی خبررساں ادارے کے مطابق ترجمان امریکی محکمہ دفاع نے ایک بیان میں کہاکہ     امریکی افواج کی تعیناتی امریکی اہلکاروں اور تنصیبات کے خلاف بڑھتے ہوئے خطرات کے، جیسا کہ بغداد میں دیکھنے کو ملا ہے، مدنظر

مناسب اور احتیاطی اقدام کے طور پر کی جارہی ہے۔ انہوں نے مزید کہاکہ امریکا دنیا بھر میں کہیں بھی اپنے عوام اور مفادات کا تحفظ کرے گا۔توقع ہے کہ آئندہ چند دنوں میں امریکی فوجیوں کو تعینات کردیا جائے گا۔ تعینات کی جانے والی نئی افواج امریکی صدر ڈونلڈ ٹرمپ کے براہ راست کمان میں ہو گی۔جن 750  فوجیوں کو فوراً تعینات کیا جا رہا ہے وہ خلیجی علاقے میں پہلے سے ہی تعینات 14,000 امریکی فوجیوں میں شامل ہوجائیں گی۔