ریاض(این این آئی)سعودی ولی عہد شہزادہ محمد بن سلمان نے درعیہ شہر میں شروع ہونے والے فارمولا ای کار ریس مقابلے میں شرکت کی۔میڈیارپورٹس کے مطابق بین الاقوامی آٹوموبائل فیڈریشن (ایف آئی اے)کے زیر اہتمام اے بی بی فارمولا ای الیکٹرک کار چیمپیئن شپ کی افتتاحی تقریب میں ولی عہد شہزادہ محمد بن سلمان نے شرکت کی جس کے بعد مقابلے کا باقاعدہ آغاز ہوگیا۔تقریب میں خلیجی ریاست بحرین کے ولی عہد
شہزادہ سلمان بن حمد آل خلیفہ نے بھی فارمولا ای ریس اور اس کے ساتھ ہونے والے پروگراموں میں شرکت کی۔فارمولا ای ریس الدرعیہ سیزن کا ایک حصہ ہے۔ الدرعیہ سیزن کی تفریحی تقریبات ایک ماہ تک جاری رہیں گی۔ اس دوران کھیلوں کے مختلف ایونٹس منعقد کیے جائیں گے۔ جن میں تاریخی الدرعیہ بٹالین، ورلڈ ہیوی ویٹ باکسنگ چمپئن شپ، مردوں کے لیے الدرعیہ ٹینس کپ اور الدرعیہ ایکویسٹرین فیسٹیول شامل ہیں۔
