نئی دہلی( این این آئی)بھارت میں الیکشن کمیشن نے عام انتخابات کی تاریخوں کا اعلان کرتے ہوئے کہا ہے کہ ووٹنگ گیارہ اپریل کو شروع ہو کر سات مرحلوں میں مکمل ہو گی اور نتائج کا اعلان 23 مئی کو ہوگا۔اتوار کو انڈیا کے الیکشن کمیشن سنیل اروڑا نے ملک کے دارالحکومت دہلی میں شیڈول کا اعلان کیا اس موقع پر صحافیوں کی ایک بڑی تعداد موجود تھی۔انہوں نے بتایا کہ ووٹنگ 11 اپریل سے 19 مئی تک جاری رہے گی۔
الیکشن کمشنر نے مختلف صحافیوں کی طرف سے سوالات کا جواب دیتے ہوئے کہا کہ تمام سیاسی جماعتوں کو متنبہ کر دیا گیا ہے کہ انتخابی مہم کے دوران حاضر سروس فوجیوں کی تصاویر استعمال کرنے کی اجازت نہیں ہو گی۔انڈیا میں ووٹروں کی تعداد 90 کروڑ سے زیادہ ہے جو تقریباً دس لاکھ پولنگ سٹیشنوں پر اپنی رائے کا اظہار کریں گے،یہ دنیا کے سب سے بڑے انتخابات ہیں۔ انڈیا کی پارلیمان کی 543 نشستیں ہیں اور کامیابی کیلئے 272 نشستیں درکار ہوں گی۔انڈیا کے ووٹروں کی تعداد یورپ اور آسٹریلیا کی کل آبادی سے زیادہ ہے۔انڈیا کے پہلے انتخابات 1951۔52 میں ہوئے تھے اور تین ماہ میں مکمل ہوئے تھے۔ 1962 اور 1989 کے درمیان چار سے دس دن میں مکمل ہوئے اور انڈیا کے مختصر ترین انتخابات 1980 میں ہوئے تھے جو چار روز میں مکمل کیے گئے۔2014 میں انڈیا میں 8250 امیدواروں اور 464 سیاسی جماعتوں نے انتخابات میں حصہ لیا تھا۔انڈیا کے الیکشن کمیشن نے کہا کہ مقبوضہ کشمیر میں صرف پارلیمانی انتخابات ہوں گے جس میں چھ حلقے ہیں۔الیکشن کمشنر نے اعلان کیا کہ کشمیر میں سکیورٹی کی صورتحال کا جائزہ لیا جا رہا ہے اور ریاستی اسمبلی کے انتخابات کے بارے میں جلد فیصلہ لیا جائیگا۔ بی بی سی کے مطابق انڈیا کے اخبار دی ہندو کی سرخی تھی کہ جموں اور کشمیر میں صدر راج جاری رہے گا۔مقبوضہ کشمیر سابق وزیر اعلیٰ عمر عبداللہ نے اس فیصلے پر تنقید کرتے ہوئے ٹویٹ کیا کہ 2014 میں ایک بڑے سیلاب کے باوجود ریاستی اسمبلی کے انتخابات وقت پر ہوئے تھے۔انہوں نے کہا کہ 1996 کے بعد یہ پہلا موقع ہے کہ ریاستی اسمبلی کے انتخابات وقت پر نہیں ہو گے۔
