قاہرہ(این این آئی)مصر میں کھجوروں کا ایک وسیع وعریض فارم قائم کرنے کا فیصلہ کیا گیا ہے۔ یہ فارم کھجور کا دنیا کا سب سے بڑا فارم ہوگا جس میں کھجور کے 25 لاکھ درخت لگائے جائیں گے۔عر ب ٹی وی کے مطابق مصری صدرعبدالفتاح السیسی نے زرعی ترقیاتی پروگرام کی افتتاح تقریب سے خطاب میں کہا کہ حکومت ملک میں کھجور کا سب سے بڑا فارم قائم کرنے کی تیاری کررہی ہے جس میں دو ملین اور پانچ لاکھ سے زاید کھجور کے درخت لگائے جائیں گے اور اس میں اعلیٰ
معیار کی کھجوریں کاشت کی جائیں گی۔صدر السیسی نے کہا کہ حکومت زرعی منصوبوں کی ترقی اور زراعت کے فروغ کے لیے اقدامات کیے جائیں گے۔ ان منصوبوں سے زراعت کے فروغ کے ساتھ ساتھ ہزاروں افراد کو روزگار بھی ملے گا۔ادھر مصری فوج میں نیشنل سروسز کے ڈائریکٹر جنرل برائے پروجیکٹس میجر جنرل مصطفیٰ امین نے بتایا کہ 10 رمضان، ابو سلطان اور الفیوم میں اللاھون کے مقام پر 34 ہزار ایکڑ رقبہ کھجوروں کے باغات کے لیے مختص کیا گیا ہے۔
