دمشق(این این آئی)شام سے امریکی فوج کی واپسی کے اعلان پر جہاں امریکا نواز قوتوں کو تشویش ہوئی ہے وہیں ان کا کہنا ہے کہ امریکی صدر کے فوج واپس بلانے کے فیصلے کا انہیں بہ خوبی علم تھا۔شمالی اور شمال مشرقی شام میں کرد جنگجوؤں کی سفارتی تعلقات کمیٹی کے ترجمان کمال عاکف نے انکشاف کیا کہ شام سے امریکی فوج کے انخلاء کا فیصلہ اچانک نہیں بلکہ انہیں پہلے سے اس کا علم تھا۔
عرب ٹی وی سے بات کرتے ہوئے انہوں نے کہا کہ شام سے امریکی فوج کی واپسی کا فیصلہ نا مناسب ہے اور اس کے محاذ جنگ پر منفی اثرات مرتب ہوں گے۔ ان کا کہنا تھا کہ موجودہ وقت میں داعش کو جڑوں سے اکھاڑ پھینکنے کے لیے دوگنا کوششیں کرنے کی ضرورت ہے۔ امریکی فیصلے کے نتیجے میں شام میں انتہا پسندی کی جڑیں دوبارہ پھیلنے اور داعش کو دوبارہ نشو نما پانے میں مدد ملے گی۔ کمال عاکف نیکہا کہ داعش صرف مقامی خطرہ نہیں جسے نظرانداز کردیا جائے بلکہ یہ تنظیم پوری دنیا کی سلامتی کے لیے خطرہ ہے۔ لہٰذا اس کے خلاف کارروائی پوری قوت کے ساتھ جاری رہنی چاہیے۔خیال رہے کہ گذشتہ روز امریکی صدر ڈونلڈ ٹرمپ نے شام میں موجود امریکی فوج کی واپسی کا اعلان کیا ہے۔ ان کا کہنا ہے کہ شام کی لڑائی میں اب امریکی فوج کا کوئی کردار باقی نہیں رہا ہے اور ہم اس جنگ میں اپنی فوج کو مزید نہیں جھونکیں گے۔امریکی صدر کے شام سے فوج واپس بلانے کے فیصلے پر ان کے اتحادی ممالک حتیٰ کہ ان کی اپنی جماعت نے بھی شدید تنقید کی ہے۔
