بیجنگ (این این آئی)چین نے امریکہ کا سی پیک کی دولت پاکستان کے معاشی بحران بارے بیان مسترد کر دیا ہے ۔ میڈیا رپورٹ کے مطابق چین کی وزارت خارجہ کے ترجمان لو کھانگ نے کہا کہ چین امریکہ کے اس الزام کو یکسر مسترد کرتا ہے جس میں مائیک پینس نے کہا تھا کہ سی پیک کے قرضوں کی بدولت پاکستانی معیشت کی حالت خراب ہے اور پاکستان مالی بحران کا شکار ہوا ہے ۔

انہوں نے کہا کہ امریکی الزام کے بر عکس سی پیک کا پاکستان کی شرح نمو میں رواں سال 2.5فیصد حصہ رہا ہے۔ ترجمان نے کہا کہ یاد رہے کہ پاکستانی وزیر خزانہ اسد عمر نے بھی امریکہ کے سی پیک پر الزامات کو یکسر مسترد کر دیا تھا۔ترقی پذیر ممالک چینی تعاون کو قدر کی نگاہ سے دیکھتے ہیں اور چینی تعاون کا خیر مقدم کرتے ہیں۔ امریکہ چینی تعاون پر تنقید کی بجائے اپنے نظرئیے کو درست کرے تاکہ اسے معلوم ہو کہ خطے میں خوشحالی اور استحکام کا سبب چین کا تعاون ہے۔ امریکہ کو چاہئے کہ ایسے غیر ذمہ دارانہ بیانات سے گریز کرے۔ لوکھانگ نے معمول کی پریس بریفنگ میں کہا کہ ایسا ہی الزام امریکی وزیر دفاع جیمز میٹس نے دورہ ویتنام کے دوران کہا کہ چین ترقی پذیر ممالک کو منصوبوں کے ذریعے قرض میں جکڑ رہا ہے ٗ یہ محض الزام ہے اور حقائق کے منافی ہے۔ اعداو شمار کا جائزہ لیا جائے تو معلوم پڑتا ہے کہ مختلف منصوبوں میں سرمایہ کاری زیادہ اور قرض انتہائی معمولی ہے۔ چین نے ہمیشہ دوست ممالک کی ترقی میں تعاون کیا ہے اور عوام کی بھلائی اور خوشحالی کے منصوبوں پر سرمایہ کاری کی ہے۔ چین کو اپنا اثرو رسوخ بڑھانے کی ضرورت نہیں ہے۔