نئی دہلی(اے این این ) بھارتی وزیر داخلہ راج ناتھ سنگھ نے ایک بار پھر گیدڑ بھبکی کا مظاہرہ کرتے ہوئے کہا ہے کہ پاکستان امن خراب کرنے سے باز نہ آیا تو ایک اور سرجیکل سٹرائیک کا آپشن موجود ہے ،اب عالمی برادری کو بھی یقین ہو چلا ہے کہ پاکستان دہشتگردی کا مرکز ہے،کشمیر اور کشمیری دونوں ہمارے اپنے ہیں ،ہم ان کے دل جیتنا چاہتے ہیں ،رمضان سیز فائر کا مقصد بھی یہی ہے،فورسز کے ہاتھوں 5نوجوانوں کی شہادت سیز فائر کی

خلاف ورزی نہیں ،وادی میں فوجی آپریشن معطل ہیں لیکن کوئی حملہ کرے گا تو اسے جواب ملے گا۔نئی دہلی میں بھارتی ٹی وی سے گفتگو کرتے ہوئے راج ناتھ سنگھ نے کہا کہ رمضان میں مقبوضہ کشمیر میں سیز فائر کا مقصد کشمیریوں کا دل جیتنا ہے ۔ مودی سرکار ملک سے ہر قسم کی دہشتگردی کا خاتمہ چاہتی ہے ۔انھوں نے کہا کہ مقبوضہ کشمیر میں ماہ صیام کے دوران جنگ بندی بہت اہم ہے تاہم اگر فورسز پر حملے کئے جاتے ہیں تو فوج خاموش نہیں بیٹھے گی اس کی توقع بھی نہیں رکھنی چاپیے۔انھو ں نے کہا کہ اس وقت وادی میں جنگجوؤں کیخلاف فوجی آپریشن معطل ہے ۔ہم اس بات کو یقینی بنانا چاہتے ہیں فورسز کے ہاتھوں کسی شہری کی ہلاکت نہ ہو لیکن اس کا یہ مطلب نہیں کہ مجاہدین ہم پر حملے کریں تو ہماری فورسز خاموش بیٹھیں گی،فورسز حملہ آوروں کو جواب دیں گی جیسا کہ آج بھی پانچ نوجوان مارے گئے ہیں ۔انھوں نے کہا کہ ہم کشمیر پالیسی کے حوالے سے کسی ابہام کا شکار نہیں ہیں ۔مودی سرکار ہر قسم کی دہشتگردی کا خاتمہ چاہتی ہے لیکن ہم اس بات پر بھی یقین رکھتے ہیں کہ کشمیر اور کشمیری دونوں ہمارے اپنے ہیں ہم لوگوں کے دل جیتنا چاہتے ہیں اور رمضان میں سیز فائر اس طرف ایک قدم ہے ۔انھوں نے کہا کہ جنگجوؤں سے امید نہیں رکھی جا سکتی کہ وہ سیز فائر کے ہمارے اقدام کو سپورٹ کرینگے اور نہ پاکستان سے اس کی توقع کی جا سکتی ہے ۔پاکستان نہیں چاہتا کہ بھارتی مسلمان امن کے ساتھ رمضان گزاریں ۔انھوں نے کہا کہ پاکستان کنٹرول لائن اور ورکنگ باؤنڈری پر امن خراب کرنے سے باز نہیں آیا تو ہم2016کے سرجیکل اسٹرائیک کی طرح جلد ایک اور سبق سکھائیں گے اب عالمی برادری کو بھی یقین ہو چلا ہے کہ پاکستان دہشتگردی کا مرکز ہے ۔

موضوعات:راج ناتھ سنگھ