غزہ(سی پی پی )ایک ایسے وقت میں جب کہ افریقی ممالک صہیونی ریاست کے قریب آ رہے ہیں اور بعض عرب مسلمان ریاستوں کے بھی اسرائیل کے ساتھ خفیہ تعلقات کی خبریں ہیں جنوبی افریقا نے جرات کا مظاہرہ کرتے ہوئے صہیونی ریاست کے ساتھ اپنے تعلقات مزید کم کردیے ہیں۔یہ خبر اسرائیلی ذرائع ابلاغ نے غیرمعمولی اہمیت کے ساتھ نشرکی ہے۔ عبرانی ٹی وی چینل 10 کے مطابق

جنوبی افریقہ بہ تدریج اسرائیل کے ساتھ تعلقات کو محدود کرنے کی پالیسی پر عمل پیرا ہے۔ اس نے صہیونی ریاست کیساتھ تعلقات کم کر لیے ہیں۔جنوبی افریقا کی خاتون وزیرخارجہ ماتی نکوانا ناشابان نے ایک بیان میں کہا ہے کہ ان کی حکومت کا کوئی ممبر اسرائیل کا دورہ نہیں کرتا۔ ان کا کہنا تھا کہ فلسطینی قوم کی جدو جہد آزادی ہماری جدو جہد ہے۔ جنوبی افریقا فلسطینیوں کے خلاف صہیونی ریاست کے نسل پرستانہ اقدامات کو قبول نہیں کرتا۔ایک سوال کے جواب میں جنوبی افریقا کی وزیرخارجہ نے کہا کہ ہمارے فلسطینی دوستوں نے ہم سے اسرائیل سے تعلقات ختم کرنے کو کبھی نہیں کہا تاہم ان کی طرف سے یہ درخواست آتی رہی ہے کہ ہم اسرائیل کے ساتھ سرکاری اجلاسوں میں شرکت نہ کریں۔انہوں نے کہا کہ اگرچہ جنوبی افریقا اور اسرائیل کے درمیان سفارتی تعلقات قائم ہیں مگران میں کسی قسم کی گرم جوشی نہیں پائی جاتی۔ ان کا کہنا تھا کہ ہم نے اسرائیل کے ساتھ تعلقات محدود کرنے کے لیے بہت سے اقدامات کیے ہیں۔ صہیونی رجیم کے ساتھ جنوبی افریقا نے کئی شعبوں میں تعاون ختم اور کئی میں محدود کردیا ہے۔انہوں نے کہا کہ فلسطینیوں کے خلاف ڈھائے جانے والے مظالم نے ہماری آنکھوں سے نیند چھین لی ہے۔ ان کا اشارہ فلسطین میں اسرائیلی ریاستی دہشت گردی اور فلسطین میں غیرقانونی یہودی آباد کاری کی جانب تھا۔