کابل (مانیٹرنگ ڈیسک) افغانستان کے سابق صدر حامد کرزئی نے افغانستان میں امریکی فوجیوں کی موجودگی کو افغا ن جنگ میں شدت، بدامنی اور عدم استحکام کا سبب قرار دیتے ہوئے کہا ہے کہ 16 سال گزر جانے کے باوجود امریکہ نہ تو افغانستان سے دہشتگردی ختم کر سکا ہے اور نہ ہی منشیات کی اسمگلنگ الٹا ان دونوں میں روز بروز اضافہ ہو رہا ہے ، امریکہ دہشتگرد گروہوں کوجنگی ساز و سامان بھیج کر افغانستان میں جنگ جاری رکھنا چاہتا ہے۔

افغانستان کے سابق صدر حامد کرزئی نے روسی ٹی وی چینل کو انٹرویو دیتے ہوئے کہا کہ دہشتگردی کے خلاف جنگ اور منشیات کی اسمگلنگ کی روک تھام کے بہانے افغانستان پر امریکی فوج کی یلغار سے  دہشتگردی ختم نہیں ہوئی بلکہ اس لعنت میں روز بروز اضافہ ہو رہا ہے۔ حامد کرزئی نے کہا کہ امریکہ، داعش سمیت دیگر دہشتگرد گروہوں کو اسلحے اور جنگی ساز و سامان بھیج کر علاقے میں بدامنی پھیلا کر افغانستان میں جنگ جاری رکھنا چاہتا ہے۔انھوں نے پڑوسی اور علاقائی ملکوں سے اپیل کی کہ وہ جنگ ختم کرنے میں اشرف غنی کی مدد کریں۔