بیجنگ،ووہان(این این آئی)چین میں نچلی سطح پرکرپشن کیخلاف مہم میں 13لاکھ سرکاری ملازمین کوسزائیں دی گئیں۔غیرملکی خبر رساں ایجنسی کے مطابق یہ سزائیں 2013 سے 2017 کے درمیان دی گئیں۔رپورٹ کے مطابق انسداد بدعنوانی مہم میں کئی اعلیٰ حکام کیخلاف بھی کارروائی کی گئی۔انسداد بدعنوانی کمیٹی کے سربراہ کو بھی تحقیقات کاسامنا ہے جبکہ سینئرفوجی افسر کو بھی کرپشن کے الزامات پرحراست میں لیاگیا،
جو سینٹرل ملٹری کمیشن کابھی رکن تھا۔ادھر چین کے مرکزی صوبے ہوبی کے دریائے ہان جیانگ اور دریائے یانگٹ زی میں آ نیوالے سیلاب کے پیش نظر ایمرجنسی اقدامات کا اعلان کر دیا گیا ہے، حالیہ بارشوں کے دوران ڈان جیانگ کو کے آبی ذخائر بھر گئے اور پانی سیلاب کی صورت اختیار کر گیا ، دریا کے جنگ مینگ سیکشن پر پانی کی سطح خطرے کے لیو ل سے بلند ہو گئی ہے ، اس علاقے میں تعمیراتی منصوبوں پر کام بند کر دیا گیا ہے اور دریائوں میں جہاز رانی سروس معطل کردی گئی ہے،متعدد آبی ذخائر سے پانی کا اخراج شروع ہو گیا ہے ، گذشتہ روز ہوبی کے سات بڑے آبی ذخائر میں بھی پانی کی سطح خطرے کے نشان سے بلند ہوگئی تھی جس کے باعث سیلاب کی وارننگ جاری کر دی گئی۔مقامی حکام کو ہدایات جاری کر دی گئی ہیں کہ وہ عوام کو خطرات سے آگاہ کریں اور ڈیموں کے تحفظ کیلئے کارروائی کریں ،ڈانگ جیان کو کے آبی ذخائر میں 6180کیوبک میٹر فی سکینڈ کے حساب سے پانی آ رہا ہے جبکہ 7460کیوبک میٹر فی سیکنڈ کے حساب سے پانی خارج کیا جارہاہے ۔
