دبئی(این این آئی)دبئی پولیس کے سابق سربراہ ضاحی خلفان نے کہا ہے کہ وہ خلیجی عرب ممالک کے قطر کے ساتھ جاری موجودہ بحران کے فوری حل کے لیے کوئی زیادہ پْرامید نہیں ہیں۔ ہم فی الوقت یہ بات نہیں جانتے ہیں کہ دوحہ کے معاملات کو کون چلا رہا ہے۔
لیفٹیننٹ جنرل ضاحی خلفان عرب ٹی وی سے بات چیت کررہے تھے،انھوں نے کہاکہ میرے خیال میں قطری عوام یہ سمجھتے ہیں کہ ان کی قسمت خلیجی بھائیوں کے ساتھ وابستہ ہے جبکہ قطری حکومت ہمسایہ ممالک کے مطالبات کا جواب دینے میں ہچکچا رہی ہے۔ضاحی خلفان کا کہنا تھا کہ ان کے خیال میں قطر اپنی سیاست میں تبدیلی لانے میں بنیادی طور پر دلچسپی نہیں رکھتا ہے جبکہ اس کی خارجہ پالیسی ہمسایہ ممالک میں مزاحمت کاری پر اکسانے کی رہی ہے۔سعودی عرب ،متحدہ عرب امارات ،بحرین اور مصر نے کویتی حکومت کی درخواست پر قطر کو مطالبات کو پورا کرنے کے لیے دی گئی دس روز کی ڈیڈلائن میں اڑتالیس گھنٹے کی توسیع کردی ہے۔ان چاروں ممالک کے وزرائے خارجہ کا بدھ کو قاہرہ میں اجلاس ہوگا اور اس میں مطالبات تسلیم نہ کیے جانے کی صورت میں قطر کے خلاف آیندہ اقدامات کے حوالے سے تبادلہ خیال کیا جائے گا۔
