اسلام آباد (مانیٹرنگ ڈیسک)عرب شیخوں کی عیش پرستی کے قصے آپ نے بہت سنے ہوں گے لیکن بحرین کے ایک شیخ کے خلاف لندن میں دائر کیے گئے مقدمے میں ان کی شاہ خرچیوں کے ایسے انکشافات سامنے آئے ہیں کہ دنیا کے امیر ترین افراد بھی اپنا سا منہ لے کر رہ گئے ہیں۔ بحرینی شیخ حماد عیسیٰ علی الخلیفہ کے خلاف مصر کے ایک بزنس مین احمد عادل عبداللہ نے سوا چار کروڑ ڈالر (تقریباً سوا 4 ارب پاکستانی روپے ) ہر جانے کا
دعویٰ کیا ہے ۔لندن کی عدالت میں دائر کئے گئے مقدمے میں بزنس مین احمد عادل عبداللہ کا کہنا ہے کہ بحرینی شیخ نے 26 بالی ووڈ سٹارز کے ساتھ ملاقات کے عوض انہیں یہ رقم دینے کا معاہد ہ کیا تھا۔ ان میں سے چار چوٹی کے فلمسٹاروں سے شیخ ملاقات کرائی گئی، جن میں شاہ رخ خان بھی شامل تھے۔ درخواست گزار کے مطابق اس کے بعد بحرینی شیخ معاہدے سے پھر گئے اور باقی سٹارز سے ملاقات سے انکار کر کے انہیں لاکھوں ڈالر کا نقصان پہنچایا۔ درخواست گزار کے مطابق ہر فلمسٹار سے شیخ کی 15 سے 25 منٹ کی ملاقات کے عوض اسے 15 لاکھ ڈالر (تقریباً 15 کروڑ پاکستانی روپے ) ملنے تھے، جبکہ ہر تیسری ملاقات پر اسے 5 لاکھ ڈالر ( تقریباً 5کروڑ پاکستانی روپے) کا بونس بھی دیاجانا تھا۔مصری بزنس مین کا کہنا ہے کہ اس نے چار بالی وڈ سٹارز کے ساتھ بحرینی شیخ کی ملاقاتیں ممبئی اور دبئی میں کرائی تھیں، اور باقی سٹارز کے ساتھ ملاقاتوں کا بھی اہتمام کر لیا تھا لیکن بحرینی شیخ نے یہ سلسلہ جاری رکھنے سے انکار کر دیا ہے ۔ بزنس مین کے مطابق بالی ووڈ کے مہنگے ترین فلمسٹارز سے وقت لینے اور انہیں بحرینی شیخ کے ساتھ ملاقات پر تیار کرنے کیلئے اس کے بے پناہ اخراجات ہو چکے ہیں ۔
