انقرہ (آئی این پی) ترکی نے کہا ہے کہ قطر کے حقوق کا ہرقیمت پر تحفظ کیا جائے گا۔ یہ بات ترکی کے وزیر دفاع فکری اسحاق نے قطری ہم منصب کے ساتھ ملاقات کے دوران کہی۔ترک وزیر دفاع نے انقرہ میں وزارت دفاع کے دفتر میں ہونے والی ملاقات میں کہا کہ خلیجی ممالک آپس میں بھائی بھائی ہیں اور ان کے درمیان اختلافات کو سنجیدہ مذاکرات کے ذریعے طے کر لیا جائے گا۔ بات چیت کے دوران قطر کے حقوق کا بھی احترام کیا جائے گا۔سعودی عرب ، متحدہ عرب امارات ، مصر اور بحرین نے قطر سے
اپنے سیاسی، اقتصادی اور سفارتی تعلقات منقطع کردیے ہیں، جبکہ ترک صدر رجب طیب اردگان نے قطر کو تنہا کرنے کی شدید مخالفت کی ہے ۔ترکی نے متعدد طیاروں اور ایک مال بردار بحری جہاز کے ذریعے قطر کو خوراک اور امداد روانہ کی ہے۔ ترکی کے قطر کی حمایت میں کھل کرسامنے آنے کے بعد عرب اور خلیجی ممالک میں کھلبلی مچ گئی ہے اور اس سلسلے میں مشاورت کاسلسلہ جاری ہے امید کی جارہی ہے کہ جلد ہی اس معاملے پر عرب اورخلیجی ممالک کے مشترکہ موقف کا باضابطہ اعلان کیاجائے گا۔