ریاض( آن لائن)مسجد حرام میں سیکیورٹی پرمامور فورسز کے ترجمان کا کہنا ہے کہ خانہ کعبہ شریف میں حجر اسود کی حفاظت پر مامور اہلکار کے ذمہ متعدد ذمہ داریوں کی انجام دہی شامل ہے۔ ان میں ضیوف الرحمان [ عازمین حج وعمرہ] کی رہ نمائی، حجر اسود کو بوسہ دینے کا طریقہ اور حجر اسود کے مقام پر رش کم کرنے جیسی ذمہ داریاں شامل ہیں عرب میڈیا کے مطابق مسجد حرام کی سیکیورٹی فورز کے ترجمان سامح السلمی نے بتایا کہ حجر اسود کی سیکیورٹی پرمامور اہلکار کو ہر گھنٹے بعد تبدیل کیا جاتا ہے۔
جلدی تبدیلی کا مقصد اہلکاروں کو ہمہ وقت چوکس رکھنا ہے۔ ان کا کہنا ہے کہ حجر اسود کے پہرے دار حجاج و معتمرین کی ہنگامی حالت میں مدد، ان کے بے ہوش ہونے یا گرنے کے بارے میں متعلقہ حکام کو فوری اطلاع پہنچاتے ہیں۔ واضح رہے کہ حجر اسود کی خانہ کعبہ میں نصب ایک سیاہ پتھر ہے۔ حجاج، معتمرین اور زائرین اس پتھر کو چومنے اور چھونے کو کار ثواب سمجھتے ہیں۔
