برسلز(این این آئی )بیلجیئم کے وزیر اعظم چارلس مچل اس وقت جزوی بہرے ہو گئے جب ان کے کان کے قریب ایک دوڑ کے آغاز کے لیے پستول چلائی گئی۔غیرملکی خبررساں ادارے کے مطابق یہ واقعہ برسلز میں پیش آیا جب ملک کی شہزادی نے وزیر اعظم کے کان کے بہت قریب پستول چلا دی۔
تصویر میں شہزادی ایسٹرڈ کی جانب سے پستول چلائے جانے پر وزیر اعظم کا ردعمل دیکھا جا سکتا ہے۔حکام کے مطابق وزیر اعظم کے ٹیسٹ ہوئے ہیں اور انھوں نے پارلیمنٹ کے سیشن میں بھی شرکت نہیں کی۔وزیر اعظم کے ترجمان کا کہنا تھا کہ وزیر اعظم ٹینائٹس کا بھی شکار ہیں۔ ٹینائٹس میں کانوں میں گھنٹیوں کی آوازیں آتی ہیں۔تاہم ترجمان نے فرانسیسی خبر رساں ایجنسی سے بات کرتے ہوئے کہا کہ وہ مزید تفصیلات نہیں دے سکتے۔54 سالہ شہزادی ایسٹرڈ بیلجیئم کے بادشاہ کی چھوٹی بہن ہیں۔
