اسلام آباد(مانیٹرنگ ڈیسک) روس نے دنیا کا سب سے خطرناک کروز میزائل بنالیا ۔ 7400 کلومیٹر فی گھنٹہ یعنی آواز سے 6 گنا زیادہ رفتار سے پرواز کرتے ہوئے ہدف کو نشانہ بنانے کی صلاحیت رکھتا ہے۔ تفصیلات کے مطابق روس نے دنیا کا سب سے خطرناک بحری جہاز شکن کروز میزائل بنا لیاہے۔ روسی ماہرین کے دعویٰ کے مطابق دنیا کا بہترین میزائل شکن نظام بھی اس کا
راستہ نہیں روک سکتا۔روسی میڈیا کے مطابق ’زرکون‘ نامی یہ ہائپرسونک کروز میزائل ناقابلِ شکست، ناقابلِ مزاحمت اور ناقابلِ دفاع ہے جو ہائپر سونک یعنی آواز سے 6 گنا زیادہ رفتار تک پہنچنے کےلیے ’’اسکریم جیٹ‘‘ ٹیکنالوجی سے استفادہ کرتا ہے۔ اس میزائل پر روسی ماہرین کئی سالوں سے تحقیقات جاری رکھے ہوئے تھےاور اس سال زرکون کی عملی آزمائشیں کی گئیں جو بہت کامیاب رہیں۔واضح رہے کہ اب تک ہائپر سونک پیمانے کی رفتار تک پہنچنا صرف بیلسٹک میزائلوں ہی کے بس میں تھا جبکہ زرکون وہ پہلا کروز میزائل ہے جو ہائپر سونک رفتار تک پہنچا ہے۔ زرکون اتنا تیز رفتار ہے کہ اس وقت دنیا کا جدید ترین میزائل ڈیفنس سسٹم بھی اس کا راستہ نہیں روک سکتا جبکہ روایتی ہتھیاروں کے علاوہ اسے ایٹمی ہتھیاروں سے بھی لیس کیا جاسکتا ہے۔ واضح رہے کہ بھارت اور روس مشترکہ طور پر ’’براہموس 2‘‘ ہائپرسونک کروز میزائل پر بھی کام کررہے ہیں جو آواز سے دگنی رفتار پر پرواز کرنے کے قابل ہوگا۔ قوی امکان ہے کہ زرکون سے متعلق خبریں آنے کے بعد بھارت یہی ٹیکنالوجی ’براہموس 2‘ کےلیے حاصل کرنے پر اصرار کرے گا جس سے نہ صرف جنوبی ایشیا ئی ممالک خصوصاََ پاکستان بلکہ دنیا کے دیگر اہم ممالک میں بھی تشویش کی لہر دوڑ سکتی ہے۔
