اسلام آباد(مانیٹرنگ ڈیسک)بھارتی سرکار کی مسلم دشمنی انتہا کو جا پہنچی ، تاریخ کی کتابوں میں مسلمانوں کی فتوحات کو مسخ کرنے کا منصوبہ تیار کر لیا گیا ہے۔ تفصیلات کے مطابق برصغیر کی تاریخ کی مستند کتابوں میں ہلدی گھاٹی کی جنگ میں مغل بادشاہ اکبر نے اپنے حریف رانا پرتاپ کو شکست دےکر فتح حاصل کی تھی مگرریاست کی وزیر اعلیٰ وسندھرا راجے سندھیا

کی حکومت میں شامل تین وزرا راجستھان یونیورسٹی سطح پر پڑھائی جانے والی تاریخ کی کتابوں میں مسلمان مغل بادشاہ اکبر کی اس فتح کو مسخ کر کے رانا پرتاب کو فاتح قرار دلوانے کیلئے سرگرم عمل ہیں۔معروف بھارتی اخبار کی رپورٹ کے مطابق راجستھان میں یونیورسٹی سطح پر پڑھائی جانے والی تاریخ کی کتابوں میں تبدیلی کی جا سکتی ہے۔اخبار کے مطابق ریاست کی وزیر اعلیٰ وسندھرا راجے سندھیا کی حکومت میں شامل تین وزرا نے اس تجویز کی حمایت کی ہے جس کے تحت تاریخ کے حقائق بدلنے کا منصوبہ ہے۔اس تجویز کے مطابق اب طالب علموں کو یہ پڑھایا جائے گا کہ ہلدی گھاٹی کی لڑائی میں پرتاپ نے مان سنگھ کی قیادت میں لڑنے والی اکبر کی فوج کو شکست دی تھی۔تاریخ کی کتابوں کے مطابق 1576 میں ہلدی گھاٹی میں ہونے والی جنگ کے بعد راجپوت راجہ مہارانا پرتاپ پہاڑوں کی طرف چلے گئے تھے۔ بعد میں اکبر نے فوج کی خود کمان سنبھالی اور اس خطے کے بیشتر علاقوں پر قبضہ حاصل کر لیا تھا۔بھارتی مورخین نے ریاستی وزرا کے اس عمل کو تاریخ کی توہین اور تعلیمی عمل سے کھیل قرار دیا ہے، نامور مورخ تنوجا کوٹھیال کا کہنا ہے کہ مقامی افراد کے احساسات اور خیالات کے احترام میں تاریخ مسخ نہیں کی جا سکتی۔