مظفرآباد/اسلام آباد(این این آئی)لائن آف کنٹرول پر آزاد جموں و کشمیر میں بھارتی فورسز کی فائرنگ کے نتیجے میں ماں بیٹی سمیت 3 افراد شہید اور تین زخمی ہوگئے جبکہ فتر خارجہ نے مسلسل سیریز فائر معاہدے کی خلاف ورزی پربھارتی ڈپٹی کمشنر کو طلب کر کے شدید احتجاج کیا ۔ضلع پونچھ کے سینئر سپرنٹنڈنٹ پولیس (ایس ایس پی) میر عابد نے بتایا کہ بٹل سیکٹر میں فائرنگ دن ایک بجکر 35 منٹ پر شروع ہوئی اور بھارتی فورسز نے چھوٹے اور بڑے ہتھیاروں کی مدد سے معمول کے مطابق سویلین آبادی کو نشانہ بنایا۔انھوں نے بتایا کہ ایک مارٹر شیل منڈھول گاؤں میں ذاکر حسین شاہ کے گھر پر گرا جس کے نتیجے میں ان کی 45 سالہ اہلیہ مسز کلثوم اور 6 سالہ بیٹی آمنہ موقع پر ہی شہید ہوگئی ذاکر شاہ کے 30 سالہ بھائی نزاکت کی حالت تشویش ناک ہے۔میر عابد نے بتایا کہ مہندری برج کے علاقے میں ایک اور شخص بھی بھارتی فائرنگ کے نتیجے میں شہید ہوگیا ایس ایس پی کا کہنا تھاکہ اسی سیکٹر میں 62 سالہ رفیق اعوان اور ایک گھریلو خاتون رابعہ زخمی بھی ہوئیں۔دوسری جانب پاکستان نے بھارتی ڈپٹی ہائی کمشنر جے پی سنگھ کو ایک بار پھر دفتر خارجہ طلب کرکے لائن آف کنٹرول کی سنگین خلاف ورزی کرنے پر احتجاج کیا احتجاجی مراسلے میں کہا گیا کہ سرحد پر فائر بندی کے معاہدے کے ساتھ ساتھ اب بھارتی سفارتی اہلکار سفارتی آداب کی خلاف ورزی بھی کرتے پائے گئے ہیں ۔مراسلے میں مطالبہ کیا گیا کہ سرحد پر فائر بندی کے معاہدے کی پابندی کی جائے ۔

موضوعات:بلا اشتعال فائرنگ بھارتی فورسز