مقبوضہ بیت المقدس(آن لائن)مسجدا قصیٰ (قبلہ اول)کے امام وخطیب اور فلسطین کے ممتازعالم دین الشیخ اسماعیل نواھضہ نے مسلم امہ پر زور دیا ہے کہ وہ قبلہ اول کو صہیونیوں کے پنجہ استبداد سے آزاد کرانے کے لیے اٹھ کھڑی ہو۔ ان کا کہنا ہے کہ صہیونی قوتیں قبلہ اول پرقبضے کے لیے متحد ہو رہی ہیں۔ عالم اسلام کو بھی اپنے تیسرے مقدس مقام کوآزاد کرانے کے لیے اپنی صفوں میں اتحاد پیدا کرنا ہوگا۔ اپنے خطاب میں انہوں نے اقوام متحدہ کے ثقافتی ادارے ’یونیسکو‘ کی جانب سے مسجد اقصیٰ کو مسلمانوں کا مذہبی مقام قرار دینے کے فیصلے کو تاریخ ساز کامیابی قرار دیا اور کہا کہ اس فیصلے کے بعد کسی کو یہ ابہام نہیں رہنا چاہیے کہ بیت المقدس اور مسجد اقصیٰ صرف مسلمانوں کا مذہبی ،تاریخی اور ثقافتی ورثہ ہیں۔الشیخ نواھضہ کا کہنا تھا کہ اسرائیل اور صہیونی دشمنوں کی شکست کے لیے یونیسکو کا فیصلہ ہی کافی ہے۔ اس فیصلے کے بعد عالم اسلام کو چاہیے کہ وہ قبلہ اول کو صہیونیوں کے پنجہ استبداد سے آزاد کرانے کے لیے منظم تحریک شروع کرے۔ انہوں نے کہا کہ اسرائیل فلسطینیوں کو قبلہ اول سے دور کرنے کی سازشیں کررہا ہے مگر فلسطینی قوم نے قبلہ اول سے اپنا تعلق مضبوط بنانے کا عزم کر رکھا ہے۔الشیخ اسماعیل نواھضہ نے کہا کہ صہیونی حکام قبلہ اول کے خلاف اشتعال انگیز کارروائیوں کے ذریعے خطے میں مذہبی جنگ کو ہوا دینے کی سازش کررہے ہیں۔ انہوں نے عالمی برادری بالخصوص مسلمان ممالک پر زور دیا کہ وہ قبلہ اول کے دفاع کے لیے ٹھوس لائحہ عمل اختیار کریں۔مرکزاطلاعات فلسطین کے مطابق اسرائیلی فوج اور پولیس کی سخت ترین پابندیوں اور رکاوٹوں کے باجود ہزاروں فلسطینی شہری نماز جمعہ کے موقع پر مسجد اقصیٰ پہنچنے میں کامیاب رہے۔مرکزاطلاعات فلسطین کے مطابق جمعہ کے روز صبح ہی سے اسرائیلی فوج اور پولیس نے غرب اردن، بیت المقدس شمالی اور جنوبی فلسطین کے علاقوں سے آنے والے فلسطینیوں کو روکنے کے لیے ناکہ بندی کردی تھی تاہم اسرائیلی پابندیوں کے باوجود ہزارروں فلسطینی نمازی مسجد اقصیٰ پہنچنے میں کامیاب رہے۔#/s#

موضوعات:امام قبلہ اول الشیخ اسماعیل